Огурки ше знова врацаю на нашо поля – того лєта коло пейдзешат продукователє у Войводини на вецей як пейц гектарох садза тоту желєняву и пласую ю до Нємецкей. Гоч єст укладаня, роботи и ризику, наздаваю ше заробку.
Дарко Михайловски з Дюрдьова зоз двома товаришами того року по перши раз почац пестовац продукт котри нє заступени на наших войводянских польох. Вони троме на пейц гектарох, або дзевец ланцох посадзели огурки.
– Надумал сом пестовац огурки, бо то єдина продукция у котрей нам ґарантую и одкуп и цену. Компания з котру сотрудзуєм дава нам репроматериял без камати, нє мушиме вельо укладац свойо средства, за початок даваю шицко потребне, а трошки одбию на концу од заробку. Пред тим як подписали контракт о сотруднїцте з компанию з Нємецкей, котра ма представительство у Ґосподїнцох, мушели одлучиц дзе посадза огурки – мушела одвитовац структура жеми, парцела мушела буц велька найменєй пейц гектари, за менши поверхносци ше нє виплаци куповац платформу за оберанє огуркох котру цага трактор зоз шлїмакову швидкосцу – гвари Дарко Михайловски.
Розгварка о новей инвестициї започала вжиме, кед Дарко бешедовал з пайташом зоз Жаблю котри бул барз задовольни зоз прешлорочну продукцию огуркох. Упутел го до роботи, алє и надпомнул же док тирва сезона нє годзен мац шлєбодного часу. Огурки швидко рошню и кед прерошню одредзену велькосц, цена нїзша и нїзша, та их треба поряднє оберац – кажди други дзень.
– У пестованю нам помагаю фаховци зоз Компаниї, вони нас совитую о шицким. Кеди и кельо треба пущиц води у системи капка по капку, з чим и кеди треба пирскац, о прихраньованю, защити… по тото же яки огурки треба оберац. Вони приду ґу нам на польо и шицко нам потолкую, а нашо лєм же бизме их послухали и порадзели ше, бо заш лєм знаю лєпше як ми – гвари Дарко.
Влонї за тоту компанию огурки садзели лєм даскелї продукователє з Ґосподїнцох и Жаблю, од того року их уж єст коло пейдзешат у цалей Войводини.
ПАУЗА МЕДЗИ КУЛТУРАМИ
З оглядом же медзи тлачидбу жита и сої ма шлєбодного часу, Дарко ше здружел з двома пайташами, польопривреднїками, и у априлу посадзени перши огурки. Фаховци котрих анґажовала компания порихтали им жем, поставели фолию, систему за наводньованє и посадзели огурки.
Оберанє почало у юнию и будзе тирвац по конєц авґуста. Дзешка од штредку юния ше обера кажди дзень, єден дзень єдну, други дзень другу парцелу, у двох зменох, анґажовани коло 30 наднїчаре. З початку було обаваня же нє будзе досц наднїчарох з валалу котри сцу робиц тоту роботу. Нєпреривна робота кажди дзень звекшала интересованє. Дарко за тераз барз задовольни з наднїчарами, гоч шицки першираз обераю огурки з платформи.
Огурки у прикочу одвожа кажди дзень на класификованє до представительства у Ґосподїнцох. Селектор-машина за пол годзини висортирує пейц тони до седем катеґорийох огурки, такой мож вираховац и заробок. Найлєпшу цену маю найменши, перша класа, велькосци од 4 по 5 центиметри – 80 евро-центи. Найтуньша, седма класа, 4 евро-центи – 12 центиметри и вецей. Друга класа 70 евро-центи, треца 50, штварта 30, пията 20, шеста 10 и седма 4 евро-центи. У контракту о сотруднїцтве и одкупу нє назначене кельо раз и як часто треба оберац огурки, кажди продукователь може направиц свой рахунок и так робиц.
– Нашо наднїчаре постали барз добри обераче. У шестей и седмей класи зме мали барз мало огурки, алє увидзиме як будзе док ше младнїки баржей розширя. Велї продукователє обераю кажди треци дзень, сцу цалком наполнїц прикоч, алє маю векши огурки. Векше количество, а менши огурки, односно заробок. То нє добре, медзи иншим и прето же векши огурки вецей цагаю состойки, та лєпше частейше оберац, же би росли вше нови огурки – гвари Дарко.
Компания продуковательох виплацує поряднє, раз до тижня, праве кед треба виплациц наднїчарох, а єдна часц ше одбива за репроматериял, нашенє, гной, наводньованє, пирсканє, гварел Дарко.
КАЛКУЛАЦИЯ О ЗАРОБКУ
За трактор зоз шлїмаковима швидкосцами и платформу, з котрей можу оберац 28 роботнїки, за сезону ше видвоює штири и пол тисячи евра. Калкулация така – за наднїчарох, гориво и репроматериял прешлого року огуркаре видвоєли коло 90 тисячи евра, шицко понад того бул їх заробок.
Нє тайна же Жабельчаньом прешлого року, кед шицко поодбивали, по єдним гектару остало коло 10 тиячи евра. Дарко нє сце калкуловац напредок яки будзе заробок, бо як и зоз шицкима културами, єст вельо фактори на котри нє мож уплївовац, а условиє су за квалитет и квантитет. Гвари же у такей системи, яку подписали з Нємцами, чежко нє буц у плусу, алє хвиля и тото зна погубиц.
– Пред двома роками була подла хвиля за пестованє огуркох. Нападало вельо дижджу, а теди их чежко защициц од хоротох, швидше рошню и преходза до нє так добре плаценей пиятей и шестей класи. И тот рок нам нє идзе на руку пре части и вельо дижджу, окреме кед за два днї спаднє и по седемдзешат литри дижджу – нє добре за плод, алє и заробок, гварел Дарко.
ОСМУ КЛАСУ НЄ ОБЕРАЮ
Кед ше першокласна огурка нє обере на час, за два днї з першей нарошнє и по штварту класу, а розлика медзи тима двома класами коло шейсц центиметри. Кед ше обера, охабяю ше лєм огурочки котри менши од найменшого пальца на руки. Найменши маю найлєпшу цену, алє вираховане же ше их нє виплаци оберац, без огляду же килограм кошта єден евро.
ЖИТАРКИ И МЕСО ОСНОВНЕ ЗА ПАРАСТА НА ВАЛАЛЄ
Крем пестованя огуркох, Дарко Михайловски обрабя свою жем и под аренду, услужно роби векшину польопривредних услугох на полю и тлачи з двома комбайнами, за цо ма двох роботнїкох. У своєй фарми седем роки кармел коло три тисячи кури по сезони. Медзитим, понеже нє може шицко постарчиц, одлучел ше кармиц швинї, котри тераз ма коло тристо.