Подрагшели кармени швинї и месо

автор ртв/бета
1.1k Опатрене

НОВИ САД – Рост цени кармених швиньох спричинєл подрагшенє швиньского меса у предавальньох, та за остатнї мешац швиньске месо подрагшало аж за 35 до 40 одсто, а драгше и живинске за 20 одсто. Медзитим, як гваря тарґовци и месаре, гражданє купую скоро у истей мири як и скорей.

Фармере гваря же им звекшанє цени одвитує прето же пред тим, пре барз тунї швинї,  мали вельки утрати. Заш лєм, оценюю же подрагшенє до 200 дин. за кґ живей ваги кармених швиньох нє причина же би месаре дзвигали цени. Звекшанє ценох у предавальньох на мало оправдане аж кед цена векша од 200 динари, гвари представитель Униї польопривредних продуковательох Златан Дюрич.

Єдна з главних причинох подрагшеня кармених швиньох то зменшанє субвенцийох фармером у Европскей униї з коло 50 на 20 до 30 еври по швинї. Пре тоти и други мири, клальнї нє маю интереси увожиц з Европскей униї, та ше врацели на домашнє тарґовище. Кармени швинї ше одкупює за 185, а пред тим були 145 динари за килограм, цо минимум же би и фармером остал заробок, гварел Дюрич.

Аґроекономски аналитичар Милан Простран аґенциї Бета гварел же ше нагадує звекшанє цени живого статку и до 200 динари, цо обезпечи обстоянє статкарох у Сербиї бо, по скорейших податкох, за остатнї 20 роки статкови фонд у Сербиї опадовал до 4 одсто рочнє, а число швиньох зменшане за 60 000.

Од шицких файтох меса у нас ше найвецей конзумує швиньске месо – аж 50 одсто. Дакеди ше трошело коло 65 кґ меса по жительови, а тераз то од 45 по 50 кґ рочнє.

ПОВЯЗАНИ ТЕКСТИ