РУСКИ КЕРЕСТУР – Пописованє нєлеґализованих обєктох у Руским Керестуре почало пред мешацом, а з 2 200 обисцох, члени Комисиї за пописованє дотераз обишли коло 400 обисца у улїцох Маршала Тита (Вельки шор) и Фрушкогорскей (Маковски шор), а тераз ше пописує обєкти у улїци Бориса Кидрича (Капущани шор). Оценєли же попис годзен тирвац и до половки идуцого року.
Даєдни людзе прилапюю, даєдни пописовачох анї нє пущаю до обисцох, цо вони пишу до звиту и вец инспектор будзе реаґовац по службеней длужносци. Пописоваче ше перше урядово представяю и питаю чи обєкти леґализовани. Кед ше власнїк зложи, вимераю обєкт, утвердза намену, фотоґрафую го и тоту документацию ше придава будовательному инспекторови до Кули, котри пребера дальши крочаї у процесу леґализованя обєктох.
Пописоваче нє уходза до каждого обисца, прето же ше нє пописує обєкти хтори будовани пред 70-има роками прешлого вику, медзитим, кед дахто ма обєкт хтори жада леґализовац а Комисия у ньго нє була, може ше обявиц до ЯКП „Руском”.
Як дознава Рутенпрес, однєдавна єст вигодносци у одношеню на першобутни план леґализованя обєктох, бо ше по новим будзе плациц лєм єдну таксу од 5 000 динари за шицки помоцни обєкти, а нє 5 000 динари по єдним, як було наявене. Ґу тому, нє будзе потребне придавац и технїчну документацию, алє лєм плациц таксу, гварел єден з членох Комисиї за пописованє Йоаким Надь.