БЕОҐРАД – Вчера у Скупштини Сербиї отримана конференция з тему „Робота и функционованє националних совитох националних меншинох“, а акцент дати на препоруку же треба робиц на квалитетнєйшей комуникациї и координациї медзи Владу Републики Сербиї и националнима совитами (НС). На стретнуцу присуствовали представителє националних совитох, медзи нїма и НС Руснацох, Влади Сербиї и мисиї ОЕБС-а у Сербиї.
Визначене же члени НС знаю цо им найвекши проблеми у роботи и функционованю, та треба же би ше уключели до правеня вименкох и дополнєньох Закона о националних совитох националних меншинох.
Директорка Канцелариї за людски и меншински права Сузана Паунович гварела же тота институция ма барз добре сотруднїцтво з националнима совитами. Наглашела и же ше вше векшу увагу пошвецує националним совитом, та того року з буджету Сербиї видвоєне 245 милиони динари, цо вецей як прешлого року.
Шеф мисиї ОЕБС-у у Сербиї Питер Буркхард поручел же робота и функционованє националних совитох значни за творенє безпечного демократичного дружтва, хторе будзе уключовац шицких поєдинцох.