НОВИ САД – Машини, опрема за польопривреду, поживово продукти лєм даєдни з понукннуцох на Медзинародним польопривредним сайме, хтори почал всоботу, 9. мая, а тирва по пияток, 15. май. За седем днї нащивительом ше представя коло 1 500 викладателє зоз 60 державох.
Саям урядово отворел министер финансийох у Влади Републики Сербиї Душан Вуйович, а присутних привитали и директор Новосадского сайму Слободан Цветкович, городоначалнїк Нового Саду Милош Вучевич и министерка польопривреди и защити щивотного штредку Снежана Боґосавлєвич Бошкович. Понеже того року жем-приятель Манифестациї Италия, на отвераню бешедовал и амбасадор Италиї у Сербиї Дюзепе Манцо, а з тей нагоди наявене и же тота держава нарок будзе жем-партнер Медзинародного польопривреного сайму.
Министер Вуйович и министерка Боґосавлєвич Бошкович ше зложели же Сербия нєдостаточно присутна на иножемним тарґовищу, на чим у наиходзацим периодзе треба вецей робиц, а окреме треба обрациц повагу на продукцию здравствено безпечней поживи и ришиц проблем исправносци води. Вуйович обачел же у Войводини велька поверхносц обрабяцей жеми нє вихаснована, цо тиж треба пременїц.
Под час Польопривредного сайму буду отримани седем колективни вистави, на хторих свойо продукти представя Словения, Република Сербска, Мадярска, Австрия, Шпания, Китай и Зєдинєни арабски емирати. Окрем того, буду отримани и рижни преподаваня, презентациї и трибини за польопривреднїкох на рижни теми, як цо то безпечносц поживи, Закон о предшатвовим финансованю, хтори ше почнє применьовац од 1. юлия, технолоґиї у системох за наводньованє и подобне.
