Право на побуну и питанє суверенитета

автор м. перкович
225 Опатрене

Еколоґийни активисти ширцом Сербиї, ище од новембрa, орґанизую розлични акциї процив експлоатациї литиюма, хтори предвидзени зоз проєктом „Ядар”, а за рахунок компаниї Рио Тинто. Проблем з експлоатацию литиюма и компанию Рио Тинто у тим же тота файта експлоатациї винїмково заґадзує животне околїско, а тота компания у швеце позната праве по тим же анї пейц пари нє дава на тото же би санирала чкоду котру прави пре експлоатацию литиюма. 

Початком децембра, блокади и протести процив Рио Тинта ескаловали, власц ше поцагла и можлїве же ше розтаргню контракти медзи державу Сербию и Рио Тинтом. О праву на побуну гражданства, о розлики сили и насилства писала сом у децембру прешлого року. Алє у случаю Рио Тинта и право на побуну, єст ище цо повесц.

Тото цо нє могло стануц до децемберского тексту, то питанє суверенитета. И гоч од животного значеня у Сербиї (як и гоч дзе индзей) же би жили у здравим штредку, точне же людзе маю леґимититет, а гражданство и леґалитет же би ше побунєли процив заґадзованя штредку. Проблем зоз „еколоґийним повстаньом” у Сербиї праве у тим же вон вецей граждански и леґални, як цо є людски и леґитимни. А од тей „больки” церпи векшина еколоґийних рухох у швеце.     

Важна розлика праве у тим же – кажди чловек нє граждан. Видзели зме то у случаю Новака Дьоковича, хтори пре нєвакцинованосц депортовани з Австралиї, бо є нє їх граждан. Источасно єст нєвакцинованих гражданох Австралиї котрих нїхто нє виганя з того континента. Тот случай указує на нєлоґичносц и ситуацию у котрей ше чловек зводзи на граждана. Нє-вакцинованого нє-граждана Дьоковича, держава Австралия вигнала (и то з правом, з боку здравя), медзитим, цо пороби з нєвакцинованима, а зоз своїма гражданами? Вони оставаю, и без сумнїву – предлужую загрожовац здравє других.

И, то праве случай и зоз Рио Тинтом у Сербиї. Знїщенє животного штредку нє даяке окремне одкрице Рио Тинта. Вельки бачки канал заґадзени ище од часу СФРЮ, а компаниї хтори го заґадзели уж даскельо раз обрацели круг зменююци „бок” и „домашнї капитал”. Интензивна польопривреда заґадзує децениями. Праве у тих остатнїх деценийох найинтензивнєйшого заґадзованя, деиндустриялизациї, моцного дружтвеного розпасмованя у преходу до капитализма – идеолоґия национализма нє сполнєла свойо обецунки. Обецани суверенитет нациї, рай на жеми, нїяк же би сцигол до Сербиї. Напроцив. И тоти нє сполнєни обецунки глєдаю жетрву. Рио Тинто приходзи после трох деценийох препаданя, странска компания, хтора нїч инше нє думала од Фията, Ла Фаржа, МК Комерца, або других домашнїх тайкунох (же би вжали профит по кажду цену), виволала гнїв. Гевто найменєй важне у приповедки о Рио Тинту, то же странска компания найвецей мобиловала людзох.    

Нє даме странцом нашу жем и нашу воду. Вода и жем зоз проєкту „Ядар” нараз наша, як и фрушкогорска (случай домашнього Ґаленса), алє тота у Бачки нє наша, або гевта на котрей вибудовани будинок? И як є вообще НАША, чи ше дахто опитал мишом, суньоґом, заяцом и чапльом о тим?

То питаня за людзох, нє за гражданство.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ