РУСКИ КЕРЕСТУР – Екипа фаховцох, на чолє з Любицу Отич, од 29. юния по 3. юлий окончела другу часц роботи на скенированю неґативох на склу познатих керестурских фотоґрафох, оца и сина Осифа и Йовґена Будинскових (Бруґошових).
На тот завод скенировани ище коло 100 неґативи, а з помоцу информаторох – найстарших жительох Керестура, векшина фотоґрафийох и идентификована. Вєдно зачувани коло 600 склєняни неґативи и на перши завод скенировани прейґ 120. Тераз фотоґрафовали и обисца и ателє Бруґошових, тиж скенировали и вельку часц їх фамелийних фотоґрафийох.
Попри Отичовей, занятей у Музею Войводини, у екипи фаховцох и тераз бул фотоґраф зоз Заводу за защиту памятнїкох Войводини Неделько Маркович и историчар Саша Сабадош, з Архиву у Зомборе.
Як гварела Отичова, средства обезпечени за ище єдно скинированє и идентификованє старих фотоґрафийох хтори шведоча о прешлосци Керестура, а потим ше будзе глєдац нови, як за доконченє тей, так и за роботу на ушорйованю фотоґрафийох и других наших дакедишнїх фотоґрафох. Тото подняце, як початок велького проєкту на зачуваню руского културного скарбу, потримую Завод за културу войводянских Руснацох и Национални совит Руснацох.