РУСКИ КЕРЕСТУР – Поставянє нового закрица на часци Здравственей амбуланти у Руским Керестуре при концу, а шицки потребни роботи вироятно буду закончени идуцого тижня, дознава Рутенпрес од роботнїкох СТПР „Марник” з Кули, котри кладу закрице.
Вчера поставени нови плочи, закрице местами и пообшиване, а ушлїдза ище закончуюци роботи, як цо то кладзенє кантичкох и цивох, цо будзе поробене идуцого тижня.
Оправянє, односно кладзенє нового закрица на Здравствену амбуланту почало 5. юлия, а роботу ше финансує з керестурского месного самодоприносу и буджету Општини Кула.
Зоз самодоприосу за тоту намену опредзелєни 700 000, а з општинского буджету 216 000 динари, но понеже явна набавка вишла туньше, 206 356 динари вироятно буду унапрямени за купованє одредзеней опреми до керестурскей Здравственей амбуланти.
