НОВИ САД – Пияток, 24. юния, опрез Кнїжкарнї „Булевар бокс” на новосадским Булеваре ошлєбодзеня отримани єднодньови Литературни фестивал „Булевар букет”, на хторим представена литература младших и старших наградзованих писательох на сербским, мадярским и руским язику. У орґанизованю того фестивалу участвовал и додаток „Руского слова” – „Литературне слово”, цо перши явни анґажман нових редакторох спомнутого додатку.
Нашо поетеси Татяна Беук Латяк, Тамара Хрин и Ася Папуґа ше представели у окремней часци Фестивалу, з назву „ТраНСпортер”, вєдно з писателями котри творя на мадярским и сербским язику.
Фестивал зоз своїм присуством звелїчали познати сучасни писатель, добитнїк Ниновей награди Слободан Тишма и млада авторка Милена Боґавац.
Фестивал промововал троязичносц, а понеже бул орґанизовани опрез кнїжкарнї, на булеваре, обчековало ше же поетох послухаю и случайни преходнїки. Но, упечаток же идея нє була продуктивна, бо читанє поезиї вимага векшу увагу и адекватнєйши простор за заинтересовану публику.