КОЦУР – Члени Церковного одбору коцурскей грекокатолїцкей церкви и парохиянє пияток, 11. децембра орґанизовали роботну акцию у Дзияковнї, з хтору викерчени коло 100 квадратни метери жеми и тераз ше ю годно обрабяц.
Викерчени простор бул зароснути з черяками и стеблами старих древох, так же на акциї древа повиберани. Розкерчена, як и друга жем коло Дзияковнї будзе дата под аренду, а тераз єст дакус менєй як гольт обрабяцей жеми.
Як Рутенпрес дознава од предсидателя Церковного одбору проф. др Михайла Фейси, понеже просториї Дзияковнї празни, буду дати на хаснованє Етно-клубу „Одняте од забуца”, хтори з тим прешири свой простор.
