НОВИ САД – Явна медийна установа Войводини „Радио-телевизия Войводини” розписала конкурс за 16 нови руски народни шпиванки за фестивал „Ружова заградка 2017“, а конкурс тирва по 16. децембер того року.
На конкурсу можу участвовац шицки заинтересовани композиторе и писателє тексту зоз Сербиї и иножемства. Шпиванки хтори буду послати на конкурс нє шму буц уж виводзени, лєбо обявйовани, а єдна особа може буц коавтор найвецей двох шпиванкох. Подношитель прияви може предложиц вокалного солисту за шпиванку.
Того року новосц же подношитель котри хаснує текст уж обявеного твора з обласци поезиї, з прияву муши доручиц и податки автора тексту и согласносц за хаснованє тексту за компонованє музичного твору. У случаю же ше хаснує текст покойного автора тексту, доручує ше податки нашлїднїкох автора и согласносц за хаснованє тексту за компонованє музичного твору.
Конкурс у цалосци мож видзиц на веб-сайту https://www.rtv.rs/sr_ci/rtv/konkursi, у найновшим чишлє новинох „Руске слово” и на нашим сайту.