БЕОҐРАД – Сербия по критериюму дїловней клими, лєпша од Македониї, Босни и Герцеґовини, Чарней Гори, алє є за жемами членїцами Европскей униї, указало виглєдованє хторе запровадзела Америцка привредна комора у Сербиї (AmChama) медзи своїма членми.
Як визначела подпредсидателька AmChama Амелия Павич, америцки инвеститоре найлєпше оценєли Закон о роботи, зменшанє буджетного дефициту и скраценє часу за видаванє будовательних дозволох.
Найгорше, по єй словох, оценєли реформу явних подприємствох, реформу парафискалу, хтора ше нєзбула и реформу явних набавкох.
– Осемдзешат одсто наших членох дума же дїловне окруженє тераз задоволююце, а велї думаю же будзе лєпше, кед слово о задовольстве зоз предходнима реформами – гврела Амелия Павич, док предсидатель Америцкей привредней комори у Сербиї Зоран Петкович гварел же америцки компаниї од 2001. року у Сербиї уложели 14 милиярди еври.
Министер финансийох Сербиї Душан Вуйович на вчерайшей конференциї Америцкей привредней комори у Сербиї наявел же до конца рока будзе пририхтани пакет порцийних законох, хтори ше одноша на ПДВ, акцизи, порцийни поступок и порцию на маєток.