РУСКИ КЕРЕСТУР – На тендер за набавку хлороґену, хтори Явне комуналне подприємство (ЯКП) „Руском” розписал концом юлия, приявела ше лєм фирма „Сиґма” д.о.о з Кули, та єй и зверене же би направела хлороґен хтори одвитує за потреби Руского Керестура.
Вредносц хлороґену будзе 13 милиони 170 000 динари, без ПДВ. Векшина средствох – 10 милиони 536 000 динари, достати з Покраїни, 2 милиони 634 000 динари обезпечела Општина Кула, а ПДВ виплацел „Руском”.
Початком октобра почню роботи на правеню площи за хлороґен, велькосци 4 зоз 3 метери, хтори ше будзе находзиц при жридлу водоводу, а там будзе уведзена и потребна електрична и водоводна инсталация.
Директор „Рускому” Иґор Фейди гварел же под час тендеру „Сиґма“ достала податки о составу води и водоводу, та по подписованю контракту почало склапянє хлороґену. Обчекує ше же тото построєнє на место будзе поставене у новембру.