НОВИ САД – Городоначалнїк Нового Саду 19. новембра розписал Явни конкурс за финансованє и софинансованє програмох и проєктох у култури Нового Саду за 2016. рок. Конкурс отворени 40 днї од розписованя, по 28. децембер.
Конкуровац можу установи култури (крем тих хторим Город снователь), здруженя у култури, уметнїки, сотруднїки, односно фаховци у култури котрим утвердзени статус у складзе зоз Законом, як и други субєкти у култури зоз шедзиском на териториї Городу Нови Сад. Можу конкуровац и церкви и вирски заєднїци.
По тим конкурсу Город будзе финансовац програми и проєкти зоз шлїдуюцих тематских обласцох: визуална уметносц и мултимедия (вистави, колониї, фестивали, роботнї); музична творчосц (фестивали, меморияли, концерти, знїманє авторских материялох); сценска творчосц (фестивали, театрални и оперски представи, уметнїцки танєц); аматерска културно-уметнїцка творчосц (робота на очуваню и пестованю народних обичайох, шпиванкох и танцох) и кинематоґрафия и авдиовизуална творчосц (фестивали, филмски презентациї).
Детальнєйши информациї о Явни конкурсу, як и потребни прияви и формулари за конкурованє мож найсц на веб-сайту Городу www.novisad.rs/contest.