Под час лєтнїх горучавох велї жителє Вербасу и зоз околїска ошвиженє пренайду на базену Центру за физичну културу „Драґо Йовович”. Обєкт хтори поступнє будовани роками, а кед таки горучави, постава центер сходзеня и младших и старших. Кед термометер указує понад трицец ступнї Целзиюсово, як цо було тих дньох, на базен ше приду ошвижиц коло два тисячи нащивителє.
Комплекс Центру за физичну културу у тей форми роби вецей як петнац роки. Будовани є поступнє у вецей фазох, а по своєй красоти и функционалносци учишлює ше до найушоренших обєктох тей файти у околїску. Забера поверхносц од 40 000 квадратни метери отвореного и 8 500 квадратни метери завартого простору. Вкупно ма 14 змисти, терени, на отвореним просторе и тиж тельо у завартим просторе зоз провадзацима просториями.
Його вибудов почала ище седемдзешатих рокох прешлого вику. У тей першей фази вибудовани жимски базен и ресторан. У другей фази, з початку осемдзешатих рокох направена и спортска гала, а у трецей фази докончени ресторан и жимски базен. До конца осемдзешатих рокох вибудовани отворени терени и додатни будинок у хторим нєшка готел.
ОД ПОЧАТКУ ПОПУЛАРНИ
Хибя ище дзепоєдни спортски змисти и терени же би центер бул комплетни. Но, лєтнї базен популарне место за сходзенє младих вецей як штерацец роки. Док го нє було, ошвиженє през лєто могло ше найсц лєм на беґелю хтори и теди, а окреме нєшка, нє мал квалитет води у хторей би ше могло купац. Можебуц то причина прецо Вербащанє чуваю и допатраю базен и комплекс спортских теренох коло нього.
– З єдного боку то точно, а з другого маме факт же кед ше до дачого нє уклада и нє отримує, швидко препаднє. Ту, насампредз, важне мац добри менаджмент, як цо маме ми у нашим ЦФК-а. По своїм змисту базен и шицки нашо терени понукаю за каждого дацо. Ту ше стретаю и младши и старши ґенерациї, на теренох, лєбо у ресторану. Мушим надпомнуц же вельо порозуменя маме и од локалней самоуправи. Шицким нам хтори ту робиме, то дава моц же бизме уложели ище вецей усиловносци же би наш ЦФК бул таки як бул дакеди, и ище лєпши и красши – гварела директорка ЦФК „Драґо Йовович” Мирослава Шекарич.
Дзекуюци такому опредзелєню, прешли рок на вербаским базену останє запаметани як найлєпши рок, односно сезона кед предати 60 000 уходнїци. У тей сезони, потераз предали 20 000 уходнїци. На початку сезони була подла хвиля, та прето лоньски рекорд того року нє будзе посцигнути. Каждого року до обєкту ше дацо уклада. Того року покладли нови туши, направени нови бариєри за дезинфекцию… При найменшим базену за мали дзеци, „бейби-базену”, поставени бависка за дзеци, гомбалки, а за родичох слункобрани и карсцелї за лєжанє. Коло базенох єст рижни терени за розвагу: мини-ґолф, одбойку на писку, фодбал у води. Ресторанска часц тиж ма добре понукнуце за ошвиженє – од сладоляду и сокох, по сендвичи, палачинки, плєскавици… Цена уходнїцох остала иста як и прешлого року, 130 динари задньову уходнїцу, а 1 500 динари кошта мешачна уходнїца. Важне надпомнуц же при концу оправянє закрица жимского базену, так же кед прейдзе лєтна сезона, може почац жимска.
БЕЗПЕЧНОСЦ НА ПЕРШИМ МЕСЦЕ
Як и векшина обєктох тей файти, и вербаски базен ма служби хтори обезпечую сиґурносц. То на першим месце служба першей помоци, а тиж так и служба ратунку. Оспособени су и порихтани вше буц у помоци кед то потребне нащивительом.
Безпечносц кед слово о квалитету води у базенох єдна од приоритетох.
– Квалитет води вше нам бул на першим месце. Так було ище кед базен почал робиц. Анализи води ше окончує на двох прикладнїкох (узоркох) у Гиґиєнским заводзе у Новим Саду. По тераз нє було неґативни резултати анализох. Напроцив. Мушим ше похвалїц же квалитет води таки же ю мож пиц. Пред початком сезони зме покладли нови филтери так же вода у базенох чиста и безпечна. Прешлого року нащивителє вербаского базену мали нагоду ошвижиц ше и у вечарших терминох. Тоту можлївосц базен пшонука и того року, алє пре подлєйшу хвилю нє було вельке интересованє за ноцне купанє – потолковал нам технїчни директор ЦФК „Драґо Йовович” Юлиян Полдруги.
Нєшка кед дакус чежше видвоїц пенєжи за одпочивок на морю, озеру, лєбо у горох, базени у Вербаше идеални за одпочивок и ошвиженє на „домашнїм терену” кед припече слунко, а температура пойдзе гет понад 30 ступнї Целзиюсово.
Здогадаюци ше вербаского базену пред 30-40 роками (кед и автор того текста бул младши), базен бул и остал култне место младим и шицким другим Вербащаньом и шицким хтори дзечнє приходзели одбранїц ше од лєтнїх горучавох.
СПОРТСКИ ЗБУВАНЯ НА БАЗЕНУ
Так повесц, од самого початку, кед базен у Вербаше почал робиц, оформени плївацки клуб. Перши добри резултати ту посцигли велї плїваче хтори кариєру почали у вербаским „Делфину”, а потим у Плївацким клубу „Бєлица”.
На базену ше каждого року отримую змаганя. Пред двома тижнями отримани традицийни „Бєлица Куп”, на хторим участвовали плївацки клуби зоз Войводини и сушедних реґионох.
МЛАДШИМ РАДОСЦ, А СТАРШИМ ХВИЛЬКИ ОДПОЧИВКУ
Лєту и купаню у базену у Вербаше найбаржей ше радую дзеци. То мож обачиц накадзи ше войдзе на базен – галайк, шмих и плюсканє. Їх думанє о базену очиглядне. Медзитим, и старши хасную шицко же би ше ошвижели хтори вон понука.
У хладку за столом и шаховску таблу и годзинку нашли зме двох визначних шахистох коцурского ШК “Омладинєц” Споменка Павичевича и Младена Масала, хтори тераз бави за вербаски Шаховски клуб. Понеже сезона змаганя ище нє почала, вони злучели добре зоз хасновитим – у хладку отримовали форму за предстояце першенство, а у павзох ше зачирйовали до базену.
– На базен звичайно приходзиме през викенд, кед хвиля красна. Розложиме шаховски фиґури, одбавиме даскельо партиї, лєбо ше розхладзуєме. Стретаме наших приятельох, побешедуєме и так “звладаме” горучаву. Єдине цо бим пременєл на базену то же бим направел вецей хладку, а шицко друге добре – гварел Споменко Павичевич.
– Нє роздумовал сом о тим же чи би дацо пременїц на нашим базену. Вироятно прето же нам ту добре и же ше добре опущиме коло шаховскей табли и на друженю. Нє менял бим нїч. Єдине цо ми дакус завадз то велька гужва, алє то на таким месце нормалне прето же шицки глєдаю ратунок од горучави – гварел Младен Масал.
Даскельо хвильки за опущованє од фамелийних обовязкох и горуцих шпоргетох нашли и два шестри, дами у найкрасших рокох, Лидия Вучинич и Дубравка Вуйович.
– На базену супер. Приходзиме кеди ґод маме часу. Нєшака нєдзеля, та зме пришли до поладня. Док ше полудзенок вари, ми пришли дакус ше ошвижиц. Базен бул дакеди красши и лєпши, бо и ми були младши. Но, ту ше нє мож нїч пременїц – гварела Лидия Вучинич.
– После напартого тижня у обисцу и каждодньових обовязкох, базен нам як оаза за опущованє, розвагу и ошвиженє. Хто бива у квартелю, примушени кед так горуцо висц з нього и ошвижиц ше. Нє знам яке би то було кед би нє було базену. Ту нам супер – гварела Дубравака Вуйович.