Уметносц порушує гранїци розума

автор опс
1.6k Опатрене

Ґала Чаки, доктор подобовей уметносци, млада новосадска малярка, хторей ше за кратки час удало свойо малюнки  викладац у найпознатших ґалерийох швета, добитнїца числених наградох и стипендийох.

Єдного дижджовного поладня Ґала ме уводзи до єй новосадского ателєу. Велька привилеґия войсц до малярского ателєу, а Ґалов лоцировани на Новосадским кею и патри просто на твердиню и Дунай, два символи нашого городу. Рика хтора зоз собу ноши огромну енерґию, приходзаци зоз далєкосци и одходзаци до далєкосци, а твердиня историйни печац прешлих викох… Ґала нашмеяна, полна енерґиї, радосно гвари же велї платна хибя, бо пошли на рижни вистави, алє и тото цо остало импресивне. Вельки платна, котри мушице опатрац домерковано, зоз дистанци, меняюци угел патреня, виглєдуюци Ґалово абстракциї…

Ґала як археолоґ, минуциозни виглєдовач далєких просторох людского єства, хтора копе по пасмох колективного нєсвидомого, домерковано одкриваюци себе. Шицко тото спознанє преноши на платно и з моцним подобовим виразом удава ше єй шицки пасма тримац у фокусу. На своїх платнох Ґала застановює час и шмерц у портретох уметнїкох хтори останю у вичносци…

– Цо Вас, у ствари, инспирує?

16-17 GALA (2)– Єдноставно, док жиєце, ви упиваце, патрице, и цалком нє важне же чи то людзе, чи то тота розгварка зоз вами, алє тото нєпреривне шлїдзенє за роздумованьом, за спознаваньом, хторе вас наводзи же бисце дацо научели, и то якашик файта инспирациї. Углавним, то людзе або мойо одношенє ґу нїм, бо през одношеня з людзми ви спознаваце себе, окреме кед то даяки траґични одношеня, кед тих людзох вецей физично нєт на тим швеце, у мнє ше будза моцни чувства и емоциї и то ме женє на роботу, так же верим же шицко у тих одношеньох.

– Одкаль черпаце таку вельку енерґию? И прецо таки вельки формати платна?

– Тота енерґия постої од кеди и я постоїм. Анї мнє тото цалком нє ясне, вироятно сом така народзена, а и вироятно тота енерґия то и жаданє кед маце циль, кед маце ясни одреднїци за цо сце створени, кед сце тото спознали вельо скорей як дахто други и вец вам и тота природносц, тота енерґия за твореньом за животом, пожиц цо длужей, же би шицко вишло з вас. А, вельки платна, кед творице на вельким формату то и векши проблем, чежше розришиц простор як на менших, и то за мнє спокуса, же бим нєпреривно ширела тоти гранїци, а потребне ми и вецей енерґиї.

– У єдней телевизийней емисиї сом видзела же малюєце зоз цалу дланю. Чи и тота тактилносц важна за подобову уметносц?

– О тим анї нє роздумуєм док малюєм, бо малюєм зоз своїм исконским єством, и кед ми шицко таке ясне у глави и кед лєм виходзи зо мнє, нє виберам анї чи то угель, анї чи то рука, анї чи то олєйова фарба… То шицко приходзи саме од себе, од вашей руки и на даяки способ ви и оформюєце тот малюнок и рисуєце зоз фарбами, то шицко якошик злучене. Так же нє виберам способ, лєм гевто же би цо лєпше вишло зо мнє.

– Як Вам ше удало обрациц увагу на себе? Як Вас препознали у швеце?

12696166_10205561781064584_922345910_n– Кед сом закончела мастер студиї у Новим Садзе на Академиї уметносцох почала сом учиц японски язик. Циль ми бул у Япону закончиц докторски студиї. Медзитим, роками сом учела японски язик и то виволало єдну файту кризи мойого єства. Нє було ми ясне чом я тераз трошим свою енерґию и себе у ученю даякого язика, кед можебуц там нє будзем анї препозната, и вец сом на якишик способ саму себе охрабрела и гварела – тераз, у тейшик способ саму себе охрабрела и гварела – тераз, у тей хвильки, конкуруєш до найлєпших ґалерийох швета, та дзе пойдзе, пойдзе. И теди, 2012. року достала сом енормно вельо награди, стипендиї, поволанки, лєм зоз свою роботу. И теди сом зрозумела же тот труд и робота можу буц препознати и з боку других народох. Значи же тота поетика можебуц нє створена лєм за тоту державу, алє же єст людзох хтори почувствую тоту мою емоцию. Од теди сом вельо шмелша. Мойо искуство ми гутори же людзе у иножемстве ценя кед видза же дахто роби, кед є щири. Тота моя щиросц барз важна на рисункох и од нєй руша почитованє и моя шмелосц викладац вшадзи по швеце.

– Кеди була тота преламна хвилька кед сце одлучели же малярство будзе ваша професия, же то будзе Вашо животне поволанє? Хто Вас потримовал и хто перши обачел Ваш талант?

– Народзена сом у Ечки, то валал при Зренянину, и дзецинство сом ту препровадзела док сом ше нєпреривно бавела и рисовала. Алє сом нїґда нє мала дакого при себе хто би ме унапрямел, нє знала сом анї за одредзени напрями на Академиї, алє сом закончела ґимназию, зренянинску, дзе ше креативносц нє пестовало, алє сце мушели буц часц униформних школярох, так же теди сом ище нє роздумовала. На концу ґимназиї, и кед уж бул час рихтац ше за студиї, оцец ми предложел же чом бим нє роздумала о рибарству, ту єст озера доокола. Гварела сом – добре, була сом школярка ґенерациї, шицко ми ишло од рук. Алє, цалком случайно, професорка хемиї ми предложела най пойдзем на даєдну годзину рисованя. И я пошла и упознала єдного винїмкового професора, хтори у мнє ознова видзел тоту жажду за бависком и креативносцу и уписала сом ше на Академию. И теди сом порозумела же барз добре робиц дацо дзе можеш виражиц власну систему роздумованя, а то креативносц и подобова уметносц.

12714173_10205561792584872_1218266541_n

– Цо за Вас малярство и уметносц вообще?

– Уметносц, думам же є доступна лєм за одредзених поєдинцох. То людзе хтори помикаю гранїци розума других людзох. А то барз озбильне и наздавам ше же тоту озбильносц раз досягнєм. То моц тих людзох же би манипуловали з людзми на добри способ, же би их наганяли напредок. А себе бим нїґда нє наволала уметнїком, бо думам же сом на початней ґарадичи, так же далєка драга до теди, а увидзиме чи ше у мнє скрива така велька моц – гвари Ґала скромно.

Тераз уж наша Новосадянка Ґала Чаки єдна з найперспективнєйших младих академских малярох у Сербиї. За штири роки закончела два мастери и докторски студиї уметносци на Факултету подобових уметносцох у Беоґрадзе.

Єй докторска вистава „In Search of Lost Time”, отримана початком юния у Ґалериї „Проґрес” у центре Беоґраду, була медийно випровадзена, а то источашнє и перша голоґрамска вистава у Сербиї. Ґала мальовала на холоґрамскей мрежи, хтора єй оможлївела нови естетични виглєдованя и тродимензийносц малюнку. То, наисце, револуционерне одкрице у швеце подобовей уметносци, а пред Ґалову творчосцу блїщаца будучносц.

ТРОДИМЕНЗИЙНИ МАЛЮНОК

– З виставу котру реализує у рамикох докторского уметнїцкого проєкту, Ґала Чаки потвердзує свою опредзелєносц ґу виглєдованю и отвераню нових просторох у власней уметнїцкей роботи. Пробуюци пренайсц одвит на даяки зложени питаня людскей еґзистенциї Ґала Чаки витворела подобове дїло, тродимензийни малюнок, хтори нам оможлївює рушанє ґу єдней иншакей, благородней, чувствительней и возбудлївей стварносци – гварел на отвераню вистави др Димитриє Пецич, декан Факултету подобових уметносцох у Беоґрадзе.

ПОВЯЗАНИ ТЕКСТИ