КОЦУР – Кнїжка „Цеплосц дїлох, перли словох – штверо дїяче у култури зоз Шиду з презвиском Лабош” Леони Лабош Гайдук, у виданю Дружтва за руски язик, литературу и културу, свою трецу промоцию дожила у Коцуре. Промоция отримана вчера, 9. октобра у парохийней сали грекокатолїцкей церкви, у орґанизациї Секциї Дружтва у Коцуре, а у сотруднїцтве з коцурску парохию и манастиром шестрох служебнїцох.
Присутних на промоциї привитал парох коцурски о. Владислав Рац, спред видавателя о кнїжки бешедовали проф. др Юлиян Рамач и Ирина Папуґа, свою рецензию кнїжки пречитал Микола М. Цап, а часц з рецензиї Вери Радивойков пречитала Снежана Шанта.
Шантова читала и поезию Єлени Орландич, народзеней Лабош, котра, попри о. Андрия Лабоша старшого, Михала Лабоша и самей авторки, єдна зоз штирох членох Лабошовей фамелиї описаних у кнїжки. На концу програми о своєй кнїжки бешедовала и авторка Леона Лабош Гайдук.
Коцур, як место промоциї тей кнїжки окреме важни, бо праве у Коцуре службовал о. Андрий Лабош мл., син Андрия Лабоша ст., дзе є и поховани, так же по промоциї на коцурским теметове нащивени гроб о. Андрия Лабоша (1866-1920) мл. и його фамелиї.
Пред тим, после Служби Божей, о. Владислав Рац служел панахиду за о. Андрия Лабоша, коцурского пароха од 1906. по 1920. рок.
