СЕРБИЯ – Вецей як трецину членства националних совитох творя жени, точнєйше, єст их 106, указую резултати найновшого виглєдованя о положеню женох у националних совитох хторе окончел Покраїнски омбудсман.
Аж 15 национални совити на чолє маю хлопа, лєм два маю предсидательки, а подпредсидателє тиж векшина хлопи. Спрам достатих резултатох, Омбудсман обачує же ше у нукашнєй гиєрархиї, цо функция нїзша – розлика женох и хлопох зменшує, цо случай и у нашим националним совиту, дзе водзаци положеня углавним маю хлопи. На позициї секретара националних совитох и у фахових службох ше находзи векши процент женох.
Од 14 националних совитох хтори доставели податки, лєм у двох єст менєй як 30 одсто жени, два маю аж и вецей як 40 одсто жени, цо барз оптимистични податки, понеже у предходних составох було скоро три раз вецей хлопох у одношеню на жени.
На месце предсидательох одборох єст два раз вецей хлопох як жени, а Национални совит Руснацох ма ровноправно розподзелєни места предсидательох, понеже од штирох одборох – два маю предсидательох, а два предсидательки. Од двох пододборох кельо ма наш Совит, єдному предсидатель жена, другому хлоп, медзитим у шицких трох роботних целох предсидателє хлопи.
После заключеня же положенє женох злєпшане у одношенє на прешли зволаня, Омбудсман ище вше наглашує же треба промововац жени на местох одлучованя.