По законченю факултета Даниела ше жадала далєй специялизовац, и вибрала олиґофенолоґию хтора ше базує на роботи з людзми зоз почежкосцами у розвою, на хторей концом прешлого року и докторовала, а шицко то з намиру же би злєпшала условия за живот особом зоз аутизмом.
Цо вецей ше упущовала до тих водох, Тамашову вше вецей цикавела робота з людзми з аутизмом. Познєйше почала робиц у школи за основне и штреднє образованє особох зоз инвалидитетом и почежкосцами у розвою „Милан Петрович”, дзе и нєшка роби як координатор дньового пребуваня за особи зоз аутизмом. Уж вецей роки зоз сотруднїками роби на идейох за злєпшованє животних условийох за таки особи. Асистент є и на Медицинским факултету у Новим Садзе, на Катедри за специялну едукацию и рехабилитацию.
– Аутизем то всеоблапююце поремеценє, алє без огляду на почежкосци особох з аутизмом, вони одрастаю и дозреваю, и як би требало буц по природним шлїду подїйох, требали би присц до тей фази дзе ше з часом и одвоя од своїх родичох, дзе формую якиш свой интеґритет, свой живот. Ми маме одредзену ґрупу особох з аутизмом хтору рихтаме праве за таке. То ше вола живот зоз потримовку и ми им на тот сособ даваме тоту можлївосц же би вони, без огляду на їх почежкосци, зоз потримовку едукованих фаховцох, жили свой живот одвоєни од родичох у заєднїцких квартельох – гвари Даниела.
ЖИВОТ ЗОЗ ПОТРИМОВКУ
Як толкує Даниела, гоч наша держава прешла през вельки трансформациї у поглядзе социялней защити, у нєй ище вше панує тот култ институциї. Нєшка ше вше частейше глєда алтернативи як цо то праве живот зоз потримовку.
– У Закону о социялней защити тот вид потримовки постої, алє вельки розкрок медзи законом и його применку у реалносци. Нє мож людзох лєм так преложиц же, „тераз ви ту будзеце жиц и точка”, муша вони прейсц през єден барз длуги период пририхтованя, понеже аутизем специфична файта поремеценя, а тиж так же би и їх фамелиї тото прилапели – гвари Даниела.
Ту дзешка и бул єй мотив за тему єй докторскей дисертациї, же би ше зоз такима виглєдованями нашла у фахових кругох и достала увагу. З оглядом на тото же особи зоз аутизмом у нашей жеми ище нє жию з потримовку, цо нє так кед слово о особох зоз интелектуалнима почежкосцами, Даниела свойо виглєдованє базовала на тей заєднїци. У єй дисертациї поровновани квалитет живота трох ґрупох – людзох хтори жию зоз фамелиями, людзох хтори жию зоз потримовку, и тих хтори жию у институцийох.
ЛЄПШИ РЕЗУЛТАТИ
– У виглєдованьох заключене же особи з почежкосцами найлєпши резултати маю кед жию праве зоз потримовку. То им дава найвецей можлївосци праве прето же су на тот способ часто уключени до даяких дружтвених активносцох, социялно су интерактивни з другима людзми, менєй присутни рижни фактори стреса, и менєй су аґресивни. Мило ми же зоз тоту мою дисертацию ище подкрипени мойо намаганя – прешвечена Даниела.
После велїх намаганьох, школа „Милан Петрович” достала хижу од Городу Нового Саду, хтору уж тераз рихтаю же би ґрупу младих людзох зоз аутизмом котра порихтана за таке, поступнє почали уключовац до програми живота з потримовку, зоз чим Даниелов циль достал красни епилоґ.
Даниела участвовала на велїх наукових конґресох и симпозиюмох, та як гвари, видвоєла би штварти Медзинародни конґрес интернационалного дружтва за физикалну медицину и рехабилитацию, 2007. у Сеулу, Корея, як и пияти таки Конґрес 2009. у Истанбулу, Турска, штварти Йордански и треци Пан Арабски конґрес физикалней медицини, артритиса и рехабилитациї, 2008, Аман/Йордан, а медзи домашнїма, треца фахово-наукова схадзка зоз медзинародним участвованьом „Актуалносци у едукациї и рехабилитациї особох зоз почежкосцами у розвою”, Смедерево 2014. и треца Интернационална наукова конференция за специялну едукацию и рехабилитацию – одроснути особи зоз почежкосцами у розвою, Шабац, 2014. рок.
МАЛЬОВАНЄ И ПРИЯТЕЛЄ
Попри тим же ище док Даниела нє докторовала, мушела робиц два роботи и учиц за испити, вше находзела часу нащивиц фамелию у Коцуре, приятельох, як и за ствари зоз хторима „польнї батериї”.
– Попри шицкого отримала сом контакти з велїма приятелями, любим препровадзовац час дома у Коцуре. Тиж так барз любим мальовац, писац поезию и ґлумиц. То таки дочасово вилєти, даяки димензиї дзе чловек источашнє и дава себе, алє ше и напольнї зоз єдну цалком иншаку енерґию.