Подприємства хтори робя леґално маю предносц же можу явно наступац, цо добре вихасновали вербаски „Бест&ко” и жабельски „ВОС системи”. Привреднїки гваря же добре же єст реґистер проблематичних руководительох и фирмох, алє шицки компетентни институциї треба же би робели свою роботу же би нє було злохаснованя.
Од початка юния на сайту Аґенциї за привредни реґистри доступна електронска база з менами руководительох и власнїкох фирмох и членох надпатраюцих одборох процив хторих вирекнути санкциї пре подле дїлованє. Им буду предочени дочасни мири забрани дїлованя, розполаганя зоз пенєжом и снованя нових фирмох.
– Електронска база з менами проблематичних фирмох и руководительох нам помага, бо велї привреднїки сцу спреведац – гвари Силвестер Полдруги, директор тарґовецкого подприємства „Бест&ко” зоз Вербасу. – Познати ми случаї же дахто загаши свойо манипулативне подприємство, а потим отвера нове и так загрожує нормалне дїлованє.
Провадзели ми у нашей фирми и по тераз, кельо и як то могло, же хтори подприємства и руководителє ризични, алє тераз на сайту Аґенциї за привредни реґистри єст лєпши и прецизнєйши информациї. Медзитим, нє знам чи то будзе мац ефекти до конца, бо и судство и други представнїки компетентних институцийох муша поробиц свою роботу же би нє було злохаснованя – спозорел Полдруги.
САЯМСКИ КОНТРАКТИ ЗА ЦАЛИ РОК
Тарґовецке подприємство „Бест&ко” зоз Вербасу основанє ище 1985. року, а од 1986. року є на Польопривредним сайме у Новим Садзе, и так кажди рок.
Силвестер гвари же добре прешли на тогорочней манифестациї, барз вельо предали продукти, як ридко потераз, було и вельке интересованє, а ище вше и тераз випоручую робу од майских дїловних контактох на Сайме. Предаваю машини по цалей Сербиї, у Войводини дакус векши, бо ту векши и польопривредни парцели, а южнєйше у Сербиї баржей преходза менши машини, бо там менши и парцели.
– Саям драги за викладача, алє ми нє робиме на чарно, каждого року зме позитвни и можеме присц на тоту вельку манифестацию, хтора ма добру традицию ище од гевтей велькей Югославиї, держави СФРЮ.
Зоз бувших републикох СФРЮ, тераз державох, шицки приходза на Польопривредни саям у Новим Садзе, а попри тим и представнїки зоз Румуниї, Болгарскей и Мадярскей, зоз хторима контактуєме – толкує Полдруги.
Фирма „Бест&ко” ше занїма зоз штирома катеґориями дїялносци: польодїлством, заградкарством, статкарством и общу дїялносцу за польопривреду (наприклад обезпечованє специялних тракторох). Зоз тим ше покрива широки потреби, та вец єст и вецей роботи.
Того року мали вельки штанд, на 900 квадратних метерох, на хторим були виложени 105 машини, репрезенти одредзених ґрупох. Сцело ше презентовац и нову механїзацию, же би людзе видзели цо ше случує у швеце, а Саям то права нагода.
Од 18 занятих у тим вербаским подприємстве, 14 були на тей манифестациї, цо шведочи о озбильносци анґажованосци у промовованю своєй дїялносци. Нащива на их штанду була барз велька, алє директор Полдруги гварел же би волєл кед би було гоч и менєй нащиви, алє же би то були наисце заинтересовани.
– Нам важна и политика субвенцийох, односно помоц дружтва же би людзе могли купиц машини. Держава направела контракт зоз банками, по хторим камата на средства три одсто фиксно, на три роки, з тим же єден рок ґрейс период, а одплацує ше на шейсц мешаци. То оможлївює купованє механїзациї, и то одвитує нашому подприємству – гвари Силвестер.
Медзитим, по його словох, людзе нє досц информовани же єст вигодни субвенциї, хтори доставаю коло 90 одсто заинтересованих. Ту треба повесц и же ше треба потрудзиц позберац и обезпечиц потребну документацию и же би кандидат за субвенцию мал потвердзенє же плацел порцию держави.
Механїзация хтору маю нашо польопривреднїки подла, велї робя зоз старима машинами, так повесц олд таймерами хтори треба заменїц. А у роботи, муши буц випочитовани ланєц продукциї, дзе нє шму буц слаби карики, бо вец цали ланєц нє функционални.
Як заключел Полдруги, треба мерковац же би ше прежило у тих нєподзекованих условийох привредзованя, а источасно буц и оптимиста.
НЄПРЕРИВНО У КОНТАКТУ И ИНФОРМОВАНЄ О ПАРТНЕРОХ
Люпка Тиркайла власнїца подприємства „ВОС системи”, хторе уж дзешец роки на Польопривредним сайме у Новим Садзе.
– Видзи ше ми же то бул найуспишнєйши Саям, найлєпше орґанизовани и найнащивенши. Маме комплетну опрему за швинярство, односно швинярски фарми, а тота велька реґионална манифестация нам место стретаня зоз дїловнима партнерами. Ту нас людзе видза и то добре, бо сцеме же би привреднїки знали цо робиме. Менши потенциялни купци и клиєнти вежню проспекти и чую цо их интересує, а з векшима зме нєпреривно у контакту.
На питанє цо би поведла о неґативносцох и тим цо позитивно уплївує на бизнис „ВОС системи”, Тиркайлова гвари же нє одвитуюца цена швиньского меса, а позитивне тото же вельки системи зоз хторима сотрудзую укладаю до роботи, веря же будзе лєпше, та вец и тота жабельска фирма може предавац свойо продукти.
– У ситуациї яка у нашим дружтве, можем повесц же добре дїлуєме и же зме задовольни, як нашо коло 40 заняти, так и нашо комитенти. Нєпреривно зме анґажовани. У перспективи єст и нови роботи – у етапох зоз велькима системами, а и менши продукователє купую од нас, понеже ше помали преширюю, спрам своїх можлївосцох.
Цо ше дотика новей електронскей бази з менами руководительох и власнїкох фирмох процив хторих вирекнути санкциї пре подле и проблематичне дїлованє, Люпка Тиркайла гвари же то добра инициятива, понеже и сама ма подли искуства.
– Можем повесц же зме мали утрати пре людзох хтори свидомо уведли фирми до блокади пре хто зна хтори причини. Познати ми случай уходзеня до проблематичних политичних кредитох прецо на концу загашене подприємство.
Маме и искуство зоз купцом хтори нам одредзени час плацел порядно за превжату робу, а вец ше случело же вжал вецей роби и после трицец дньох ше нє зявел.
Як и други привреднїки, и я думам же судство и шицки компетентни институциї у ланцу запровадзованя правней держави треба же би були ефикасни, бо иншак нє будзе хасну од лїстинох и спозореньох о манипулацийох – виприповедала Тиркайла.
ВШЕ ДАХТО НАШЕДНЄ
– Єст случай же єдна малженска пара отверала и заверала дзешец фирми, и то так же правела лєм менши пременки у назви подприємства хторе було реґистроване раз на мужово мено, раз на женово мено, па на синово мено, док сом нє обачела же то исти людзе. Вше дахто на тото нашеднє. Тужела сом их, алє свойо поглєдованя дакеди мож наплациц, а дакеди нє мож. Од даєдних и держава дзвига руки, а дакеди держава поможе у запровадзованю правди – гварела власнїца „ВОС системи” Люпка Тиркайла.
