РУСКИ КЕРЕСТУР – Туристично-привредно-културна манифестация „Днї керестурскей паприґи“ всоботу дополадня почала зоз обиходзеньом польох под паприґу, стретнуцом паприґарох зоз другима продукователями, одкупйовачами и представнїками нашенкових хижох.
Дополадня орґанизоване обиходзенє оглядного поля под паприґу чий власнїк Любомир Чизмар зоз Руского Керестура, котри сотрудзовал зоз фирмами „Аґроарм“, „ТимакАґро“ и „Белхим Кроп Протекшн“ у продукциї седем гибридох паприґи. Опатриц паприґу пришли продукователє, одкупйоваче и рижни фирми зоз Руского Керестура, алє и зоз Сербиї, а орґанизаторе оценєли же на оглядним полю було коло 200 людзох. Окрем применьованя нашеня, прихрани и препаратох хтори понукаю тоти фирми, нащивителє видзели и резултати продукциї у контейнерох и вязаня стеблох зоз манилу на кольчки.
По полудзенку паприґаре и одкупйоваче пошли опатриц паприґу у керестурским хотаре, а того року свойо парцели уступели Славко Еделински, Микола Сопка и Славко Надь. Шицки ше зложели же тот рок за паприґу у керестурским, алє и у других, барз чежки, прето же ю нападла єдна з найчежших хоротох – бактериозни пламенєц. Єй зявеню допринєсли дижджи, нїзки температури, длуги ранши роси, молга, а понеже ше бактерия швидко ширела, мало хтору паприґу нє залапела.
У валалє влонї було коло 10 одкупни места, а понеже на тогорочних „Дньох керестурскей паприґи“ були представителє коло 20 одкупйовачох, обчекує ше же тогорочни урожай будзе мац добри пласман, гоч фаховци оценюю же паприґа нє будзе високого квалитету и квантитету.
Як дознаваме од наших паприґарох, перши обераня почню концом того тижня. Одкупйоваче нє обявели одкупну цену, алє ше нєурядово бешедує же перша цена будзе коло пол евра.
