Швето вчера означене и у Новим Садзе

автор дюв
1.1k Опатрене

НОВИ САД – Зоз шветочну програму членох Руского културного центру (РКЦ), бешеду госцох и додзельованьом припознаньох, Националне швето Руснацох вчера означене и у Новим Садзе, у просторийох РКЦ.

После гимни Сербиї и шветочней шпиванки Руснацох у Сербиї „Браца Русини”, хтори одшпивал Хор „Гармония”, програму наявел предсидатель Управного одбору РКЦ Владимир Иван и привитал госцох – предсидателя Националного совиту (НС) Руснацох Славка Раца, члена Городскей ради за здравство проф. др Золтана Горвата, заменїка предсидателя НС Йовґена Мудрия, директора Заводу за културу войводянских Руснацох Серґея Тамаша, новосадского пароха о. Юлияна Раца, членох Националного совиту и присутних Новосадянох.

У своєй бешеди з тей нагоди предсидатель НС Славко Рац, медзи иншим, гварел же гоч ше часто медзи собу нє складаме, Дзень Руснацох права нагода же бизме були вєдно и забули на шицки нашо проблеми.

Др Золтан Горват визначел же ше Городска управа тих дньох заложи за винаходзенє ришеня за формованє „новей Матки”, же би ше ожило єй роботу и знова ю приведло до того „цо дакеди Матка була”. За тото єст добрей дзеки и витворенє треба обчековац у найскоршим чаше, гварел Горват.

Директорка РКЦ Наташа Макаї Мудрох пречитала кратки есей о Руснацох, а з тей нагоди и подзековала шицким членом РКЦ котри участвовали на ушорйованю просторийох Центре и уручела им грамоти.

Програма закончена з наступом Женскей шпивацкей ґрупи РКЦ, а после того бул коктел и друженє.

ПОВЯЗАНИ ТЕКСТИ