РУСКИ КЕРЕСТУР – Вчерайша порядна рочна Скупштина Месней орґанизациї Здруженя пензионерох Руского Керестура була и виберанкова, понеже пре задзекованє дотерашнього шредсидателя Владимира Югика, Скупштина потвердзела вибор Ярослава Малацка за нового предсидателя керестурских пензионерох.
Югик функцию предсидателя окончовал рок у штиророчним мандату, а тераз мандат предлужи Малацко, за хтори го, спомедзи трох предложених кандидатох, вибрал Управни одбор Здруженя. Вибор вчера потвердзели числени присутни члени Здруженя на Скупштини.
З винєшених звитох о роботи и финансийох у 2014. року видно же Здруженє добре робело, витворело векшину своєй дїялносци, досц ше укладало и до отримованя и обнавяня самого Дому, а подобни и план роботи за тот рок.
На основи Одлуки Општинскей орґанизациї, Скупштина прилапела же висина членарини за 2015. рок з дотерашнїх 200 будзе звекшана на 250 динари.
На схадзки Скупштини присуствовали и предсидатель Општинскей орґанизациї Здруженя пензионерох Душко Пеинович, предсидатель Клубу пензионерох Желько Ковач, предсидатель Националного совиту Руснацох Славко Рац и о.д. секретара Месней заєднїци Руски Керестур Юлиян Медєши. МЗ и НС Здруженє на Скупштини уручело подзекованя за сотруднїцтво и помоци у роботи, а другим донатором и спонзором котри на даяки способ помогли Здруженю, подзекованя буду уручени познєйше.
Месна орґанизация Здруженя пензионерох Руского Керестура ма активних 498 членох, док у валалє єст коло 900 пензионерох. Дзень пред отримованьом Скупштини, Здруженє орґанизовало и бал за своїх членох.
