Треца наукова конференция младих науковцох и фаховцох отримана всоботу, 21. мая, на новосадским филозофским факултету. Роботи представени зоз обласци линґвистики, литератури, историї, ґеоґрафиї и антрополоґиї. Медзи младима зоз наших местох, на конференциї участвовали и двойо студенти зоз Япону и Словацкей.
Наукова конференция младих науковцох и фаховцох отримує ше кажди други рок. Характеристична є по тим же ше обявює єй зборнїк у хторим заступени шицки теми зоз конференциї, а треце число такого зборнїка треба же би вишло у першей половки идуцого року. У орґанизациї конференциї участвовали: Нєформалне здруженє „Виглєдовацки круг”, Оддзелєнє за русинистику Филозофского факултета у Новим Садзе, а помогол и Национални Совит Руснацох – роботне цело за младеж и Завод за културу войводянских Руснацох.
Мастер професор историї Саша Сабадош участвовал у реализациї конференциї и наглашел же є барз задовольни пре рижнородносц темох хтори були заступени.
– Науково дисциплни ше преширели, тераз окрем язика и литератури, мали зме нагоду слухац и о антрополоґиї, ґеоґрафиї, населєньох. У велькей мири зме сполнєли тото цо зме заплановали ище пред штирома роками зоз першу конференцию и прешвечени сом же на шлїдуюцей конференциї пойдземе ище єден крочай, кед нє и вецей, далєй – гвари Сабадош.
МЛАДИ НАУКОВЦИ И ФАХОВЦИ
За млади особи хтори представели свойо роботи можеме повесц же су амбицийни, же су вредни и усовершую свойо знанє. На конференциї зоз рижнима темами, а вязани за Руснацох, представели ше шлїдуюци особи мср. (закончени мастер студиї) Александер Мудри, Марина Сакач, мср. Моника Абодї, Ася Папуґа, Михаїл Римар, Катарина Петрусова, мср. Канаме Окано, мср. Ана Римар, Марина Биркаш, мср. Саша Сабадош, а тиж у зборнїку ше найду и роботи мср. Сенки Надь и мср. Маї Зазуляк.
Марина Сакач
Марина Сакач зоз Нового Саду студира на Филозофским факултету у Беоґрадзе, на напряме Антрполоґия и етнолоґия, вона першираз участвовала на тей науковей конференциї. Представела ше зоз тему„Язик як основа идентитета – як Руснак/Рускиня видзи свой идентитет”.
– У виглєдованю сом мала штирох собешеднїкох, применєла сом антрополоґийну методу, а його основна характеристика то интервю. Тото цо постало швидко ясне у интервюох, то же основа нашого идентитета язик и же вон важни, бо одмалючка поставаме свидоми же то розлика медзи нами и другима нациями. Думала сом же, можебуц, вира будзе вираженша, алє заш лєм, и обчековала сом таки резултати – гвари Марина.
Катарина Петрусова
Студентка Катарина Петрусова зоз Словацкей, хтора студира у Прешове, пришла на черанку студентох, на Филозофски факултет на Катедру за руски язик у Новим Садзе. Вона тиж участвовала на науковей конференциї и представела ше зоз тему „Литературни и язични одношеня медзи карпатскима и войводянскима Руснацами у другей половки 19. вику и першей половки 20. вику”. Початок тей роботи презентовала професорови Янкови Рамачови, як семинарски задаток, потим го преширела и наступела зоз нїм на конференциї.
Зоз интересантну тему, о населєню, односно о салашох у керестурских хотарох представел ше Михаїл Римар зоз Петроварадину. Вон студент трецого року на Природно-математичним факултету у Новим Садзе, на напряме Ґеоґрафия.
Михаил Рамач и Ася Папуґа
– Зоз своїм наступом сом задовольни, алє кажди наступ мож злєпшац. Треба будз самокритични, гоч думам же шицко добре прешло. Чули зме о рижнородних темох, мали зме литературу, язик, историю, ґеоґрафиї, було интересантно. Мнє то перше участвованє, а думам же нє досц лєм писац и твориц, важнe и обявиц, бо кед ше нє обяви, вец нє ма поенту – гвари Михаїл.
Зоз Филозофского факултету, зоз Оддзелєня за русинистику, участвовала Марина Биркаш, вона виглєдовала хаснованє язика при младих Руснацох у смс порученьох.
Саша Сабадош и Марина Биркаш
– Зацикавела ме тота тема прето же цо далєй, млади Руснаци, а и други, вше вецей уруцую нови „средства” до язика, вельо ше хаснує жарґонизми, скрацени назви, анґлицизми и подобне. Интересантне тото же окреме у смс порученьох то барз виражене и прето сом сцела представиц общу слику нєшкайшого стану. Помоц у виглєдованю сом достала од младих Руснацох зоз Керестура, Нового Саду, Дюрдьова и Коцура – толкує Биркашова.
КРИТЕРИЮМИ ЗА УЧАСТВОВАНЄ
Участвовац на науковей конференциї можу млади особи хтори виполнюю одредзени критериюми. Основни критериюм то же би тема була вязана за Руснацох, односно за виглєдованє язика, историї, живота итд. Тиж ше муши виполнїц форму науковей роботи, цо значи же нєобходне хасновац наукови апарат – виглєдованє. Мастер професор руского язика и култури Ана Римар тиж участвовала у орґанизациї, и гварела же одволанє було достаточне. На конференциї представени дзешец викладаня, а публиковани буду дванац роботи.
– Нєобходне же би ше млади науковци представели зоз наукову роботу, кед ше роби о студентох на основних студийох, до огляду приходзи даяка їх семинарска робота, хтора на одредзени способ ма вязи зоз Руснацами, далєй, кед особа закончела мастер студиї, то може буц часц єй мастер роботи. Тоти цо на докторских студийох, вшелїяк муша писац науково роботи, так же даєдну зоз своїх роботох можу представиц з тей нагоди – потолковала Римарова и додала же понеже Руснацох нєт барз вельо, на тогорочней конференциї представели ше студенти зоз шицких трох уровньох, зоз основних студийох, мастер и докторских.
Ана Римар и Канаме Окано
Науково роботи представени наисце зоз рижнородних сферох. На високим уровню приказане знанє и сцелосц младих науковцох за виглєдованьом и усовершованьом. З єдного боку таки виглєдовацки роботи помагаю у розвою и збогацованю самей особи, алє тиж охабяю и позитивни шлїди у очуваню и змоцньованю руского идентитета и култури.
Наукова конференция досягла високи уровень, дзекуюцим квалитетним роботом самих учашнїкох. Таке єдно збуванє би требало мац надосц нащивительох. Заш лєм, шори у публики остали нєпополнєти. Отвера ше питанє же чи младих, а и других Руснацох наисце нє интересую таки збуваня, чи лєм нє були упуцени. На присутних змист конференциї охабел позитивни упечаток.
Александер Мудри
Моника Абодї
– Крашнє було, пачело ше ми же зме чули и о семантики язика, о литературним и сучасним язику. Шицки теми ми були интересантни, алє думам же ше визначела тема о смс порученьох, бо то наисце правда и я пишем на латинки,
а знам же то правописно нє точне. Сама конференция ми швидко прешла, час прелєцел – гвари Марина Шлемендер зоз Коцура.
Присутни могли чуц велї иновативни информациї, а после каждого викладаня була отворена дискусия.
– Пачела ми ше конференция, заступени були рижни теми хтори наисце интереснатни, задовольна сом. Думам же добре же ше орґанизує таки конференциї – толкує Тамара Салаґ зоз Дюрдьова.
Орґанизаторе задовольни зоз напрямом у хторим ше руша конференция.
– Можем повесц же сом особнє прешвечени же штварта конференция уж природно придзе и же зме направели єдну, на одредзени способ и институцию у рускей заєднїци, єдно швето науки – гвари Саша Сабадош.