КОЦУР – Того викенду, 15. и 16. юлия, у Коцуре будзе отримани Фестивал фолклору Руснацох „Коцурска жатва”. Як и скорейши роки, „Жатва” будзе мац централну и провадзаци програми у обидвох дньох отримованя.
Фестивал на пияток, 15. юлия, почнє з Литературним вечаром у лєтнєй учальнї ОШ „Братство єдинство” (на 21 годзин), а потим опрез Дому култури (на 22 г.) будзе програма за младих „Тамбуранє”.
На соботу, 16. юлия, як провадзаци програми буду вистава народних облєчивох, презентация кнїжки „Облєчиво и танци бачванско-сримских Руснацох” и етно-столи. Спомнути провадзаци програми буду у физкултурней сали Основней школи, а почню на 18,30 годзин.
Централна програма на соботу вечар на лєтнєй бини Дому култури будзе зоз штирох часцох – на 20,30 г. будзе наступ дзецинских фолклорних ансамблох КУД „Жатва” и КУД „Завичајно врело”, потим фестивалска часц, на хторей наступя КУД з Коцура, Нового Саду, Нового Орахова и Дюрдьова, а у ревиялней часци, попри спомнутих КУД-ох наступи и КПД зоз Шиду и Дом култури Руски Керестур.
Медзи фестивалску и ревиялну часцу програми на „Коцурскей жатви” участвую госци з иножемства – ансамбл „Кичера” зоз Словацкей.
Друженє будзе предлужене и по програми на Торба-балу, з тамбурову музику. Уходнїца на централну програму 100 динари, а за провадзаци програми уход задармо.