ҐУНЯ (ГОРВАТСКА) – Члени КУД „Яким Ґовля” з Миклошевцох пондзелок, 15. децембра нащивели Здруженє дзецох з окремнима потребами „Гвиздочки” у Ґунї и з тей нагоди виведли крачунску програму. Госцованє витворене у сотруднїцтве з миклошевским Здруженьом женох, хторе з власних средствох порихтало пакецики и дарунки, цо их виробели жени на креативних роботньох, за 20 защитнїкох „Гвиздочкох”.
У привитним слове у мено госцох о роботи здруженьох бешедовали їх предсидателє Штефица Войнович и Желько Лїкар, а на програми наступели члени рецитаторскей секциї миклошевского Дружтва, котри рецитовали по горватски, док младша и штредня танєчна ґрупа виведла три руски танци и одшпивала даскельо коляди.
Тоту гуманитарну нащиву потримала и Општина Томповци, хтора обезпечела превоз, а на концу предсидателька Здруженя „Гвиздочки” Стєпанка Лепориз подзековала шицким госцом же дзецом прикрашели и повинчовали наиходзаци швета.
