РУСКИ КЕРЕСТУР – Як 1. септембра почал нови школски рок и у Школи „Петро Кузмяк”, так сцигли и бивателє до єй Дому школярох. После другого уписного термину концом авґуста ту ше уписало вєдно 30 школярох з околних местох и општинох.
Интернат порихтани дочекал своїх школярох–бивательох, ґенерално є попораєни и ушорени, од спальньох, компютерскей учальнї, та по нову учальню хтора ушорена за ученє, схадзки и роботнї, и до нєй купени нови мебель.
До Школи з Министерства просвити, науки и технолоґийного розвою сцигла информация и о новей звекшаней цени за пребуванє у интернату котра тераз будзе 8.000 динари мешачно.
Понеже у интернату єст ище надосц шлєбодни места, обчекує ше же дзепоєдни школяре котри тераз буду путовац до школи, у жимских мешацох виберу пребувац у доме школярох, яка була пракса и прешлих рокох.