РУСКИ КЕРЕСТУР – У рамикох 54. Фестивалу рускей култури „Червена ружа” у дворе Школи „Петро Кузмяк” всоботу, 27. юния отримани Пияти Керестурски саям, хтори того року бул пошвецени старим ремеслом, алє свойо роботи викладали и дзепоєдни поднїмателє з вецей местох.
Ручни роботи, сувенири и рижни други виробки, та єдла, на Сайме викладали здруженя „Панония” зоз Сивцу, „Василиса прекрасна” з Червинки, „Идея” з Кули, „Вредни руки” з Крущичу, „Мимика” з Кули, „Склєнки-уникати” з Нового Саду, „Биляна” з Кули, домашня „Байка” и парихойни Каритас з Руского Керестура, та поєдинци – Александар Лукич зоз Суботици, Наташа Настасич, Мария Малацко, Михал Фейди и Владимир Дудаш з Керестура.
Продукти з обласци привреди на Сайме приказали Индустрийна електронїка „Електра” Юялияна Еделинския з Петроварадину, цегелки за пеци майстор Ярослав Варґа з Керестура, Винария „Руски двор” зоз Шиду, СЗР „Унита” з Кули Янка Катону, Алатнїца „Регак” Любомира Регака з Кули, а цадзени олєї Янко Семан з Керестура и „Ековитал” з Бикичу.
Видавательну дїялносц по руски на Сайме представело НВУ „Руске слово”, а окреме и його заступнїк Янко Киш з Нового Саду, а свою активносц пропаґовали Туристичне здруженє „Руски Керестур” и домашнє Здруженє паприґарох.
У мено орґанизаторох сайму – Здруженя ремеселнїкох и приватних поднїмательох и Здруженя женох „Байка”, викладачох и присутних на отвераню привитал предсидатель Здруженя ремеселнїкох Владимир Емейди, а на отвераню бешедовали предсидатель Реґионалней привредней комори Зомбор Зоран Булатович и помоцнїк покраїнского секретара за привреду, обезпечованє роботи и ровноправносц полох Желько Двожак, обидвоме з Кули.
Саям орґанизовани з потримовку Општини Кула, єй Аґенциї за розвой и Месней заєднїци Руски Керестур, а з финансийну потримовку Покраїнского секретарияту за польопривреду, водопривреду и лєсарство АП Войводини.
У окремней ґалериї з фотоґрафиями з манифестацийох „Ружи”, на правим боку порталу „Руского слова” и Рутенпресу обявени вецей фотоґрафиї и з Керестурского сайму.
