РУСКИ КЕРЕСТУР – На стадионє Русину у Руским Керстуре внєдзелю, 28. юния, отримани турнир у фодбале за пионирох у рамикох Спортских бавискох „Яша Баков”.
На турнире участвовали пионире Бачкей з Дюрдьова, Искри з Коцура и домашнього Русину, полчас змаганя тирвал 20 минути, а бавели кажда екипа у кажду.
Перше место освоєли пионире Русину, друге Бачкей, а треце Искри. Першонаградзени достали медалї з подобу Яши Бакова, а друго и трецопласовани дипломи, хтори им спред ФК Русин уручели Борис Шайтош и Златко Саянкович.
Змаганя пионирох судзели троме реґистровани фодбалски судийове з Руского Керестура – Надь, Чапко и Орос.
После змаганя, за младих фодбалерох у просторийох Русину на Ярашу орґанизоване друженє.
