РУСКИ КЕРЕСТУР – На представи за дзеци „Побиднїки”, котра вчера 17. априла виведзена у рамикох 56. Драмского мемориялу Петра Ризнича Дядї, у публики були и 80 школяре зоз наших руских местох дзе єст порядна лєбо виборна настава по руски. Їх приход орґанизовал и финансовал Национални совит Руснацох прейґ Одбору за образованє.
Школяре младшого возросту зоз своїма наставнїцами и учительками припутовали орґанизовано з Нового Саду, Дюрдьова, Вербасу, Коцура, Кули, а тиж и з Нового Орахова и Бачкей Тополї, зоз Сриму.
Попри тим же були на представи, школяре нащивели и Школу „Петро Кузмяк” дзе их привитала помоцнїк директора Ясминка Надь, там мали и почасценє, а тиж им домашнї поуказовали найсучаснєйши кабинети, терховню, дом школярох и друге цо школа понука.
Потим нащивели и шедзиско Националного совиту и музейну збирку у будинку Замок дзе их привитал предсидатель Вивершного одбору НСР Желько Ковач, а отамаль пошли опатриц и катедралну церкву св. о. Миколая дзе им о єй историї, як и о Водици бешедовал капелан о. Михайло Шанта.
Приход дзецох з наших местох на Драмски мемориял НСР орґанизовал знова после даскельорочней прерви, кед тоти традицийни приходи до Керестура прервала епидемия корони.