НОВЕ ОРАХОВО – Централна преслава Националного швета Руснацох у Новим Орахове почала зоз Архиєрейску службу Божу хтору служели двоме владикове – епарх кир Георгий Джуджар и бискуп суботицкей бискупиї Ференц Фазекаш, зоз священїками о. Владиславом Рацом, о. Михайлом Режаком, о. Данилом Задрепком, о. Иваном Дацешеном, о. Владимиром Еделински Миколком и римокатолїцким священїком о. Ґабором Балинтом.
Цалу Службу шпивал церковни хор зоз Коцура зоз хторим руководзел Александар Планкош. У служби було вельо госцох, алє и домашнїх Ораховчанох о чиїм ше духовним живоце уж 40 роки стара о. Владислав Рац.
Наказовал владика кир Героргий Джуджар визначуюци же „од 2008. року каждого 17. януара преславюєме Националне швето Руснацох и здогадуєме ше далєкого датума 1751. року кед царска комора Австроугорскей подписала контракт, о пресельованю перших фамелийох до нєшкайшого Керестура. Теди Франц де Редл нє могол, анї подумац же ше його мено будзе споминац и после 275 рокох. И перши нашо приселєнци себе нє могли, вироятнє, задумац же ше их потомки, после єдней штварцини тисячрочя буду зоз подзековносцу здогадовац. А збуло ше праве тото – ниа, ми ше нєшка позберали вєдно и святочно пошведочиц вирски, културни и национални идентитет хтори нас зачували, а хтори нам пренєсли нашо нєзабути предки.
До тей вирносци ше уписує и наша заєднїца у Новим Орахове, хтора пред 80 роками була ту пресадзена и ту пущела коренї на плодней ораховскей жеми. Треба подзековац священїком хтори од початку провадзели тоту заєднїцу, а найдлужей и з навекшу пошвеценосцу и жертву до того валалу приходзи о. Владислав Рац.
През єдну штварцину тисячрочя наш народ пущел глїбоки коренї хтори виросли до велького древа, знаме же кажда рика без жридла нє може чечиц, так и кажде древо без кореня ше висуши, а так исто и кажда заєднїца и кажди народ без кореня нє може жиц. Дзбайме за тото древо, затримайме го же би и далєй було желєне же би приношело плоди. Ми знаме же наша судьба у Божих рукох, алє як видзиме, вона и у наших рукох и ми ше за ню мушиме старац, та нас Бог будзе благословиц. То була и остава єдина правилна драга за нас и другей драги нєт”.
