ВЕРБАС – У Центре за физичну културу Драґо Йовович у Вербаше Општинска орґанизация инвалидох роботи орґанизовала вчера, 6. юния роботню – Школу мальованя односно подобову колонию. На нєй участвовали маляре аматере зоз општини Вербас алє и других местох.
Предсидатель вербаскей Орґанизациї инвалидох роботи Светислав Аларґич потолковал же то уж 13. роботня, односно школа мальованя. На терашнєй участвовали двацец двойо уметнїки-аматере зоз општини Вербас, Кули, Оджаку, Бачкей Тополї, Панчева и Сримских Карловцох. То орґанизациї до хторих и вони одходза и дзе су госци на їх роботньох и колонийох. Найважнєйше на таких збуваньох же би ше людзе дружели, вишли зоз своїх домох, же би видзели дацо нове и охабели цошка красне за собу. На колонийох участвую маляре аматере, найчастейше особи зоз инвалидитетом, алє єст и особи хтори нє инвалиди, алє ше занїмаю аматерски зоз мальованьом.
Малюнки ше нє предава, алє ше их виклада у просторийох вербаскей орґанизациї инвалидох роботи, а потим ше их дарує людзом хтори заслужни, хтори им помогли, хтори одходза до пензиї и членом з нагоди преслави рочнїцох.
На колониї було вельо уметнїкох аматерох хтори свою креативносц виражели зоз мальованьом на платну. Тема була шлєбодна, а технїка олєйово лєбо акрилни фарби.
Михайло Новак зоз Вербасу ше поряднє одволує на таку колонию. Вон гварел же малює зоз олєйовима фарбами, природу, салаши, ровнїну. За себе гварел же є лєм аматер, алє на колониї єст и наисце добрих уметнїкох. Люби присц на роботню, дружиц ше, вичерац искуство, дацо видзиц и дацо научиц. Ище додал же нє препатра зоз меншей фотоґрафиї и нє шедзи у природи, алє тото цо видзи, цо запамета преноши на платно.
Под час отримованя роботньох намальовани коло 250 малюнки. Тоти малюнки украшую просториї месних орґанизацийох у Коцуре, Савиним Селу, Равним Селу, Змаєве и у Вербаше.
