НОВЕ ОРАХОВО – Зоз Месней заєднїци (МЗ) Нове Орахово обвисцели гражданох же тих дньох валал нащивел лєсов инспектор и констатовал же на явних поверхносцох єст векше число сухи и очкодовани древа хтори загрожую безпечносц гражданох а можу направиц и векшу материялну чкоду.
Инспектор урґирал же би МЗ у цо кратшим чаше орезала нєбезпечни древа. Понеже заняти у МЗ, хтори задлужени за отримованє явних поверхносцох, нє маю часу окончиц тоту роботу, Совит МЗ обвисцел гражданох же кед опрез свойого обисца маю таки древа най их орежу и похасную за свойо потреби, а на єшень ше на тото место посадзи младе древко хторе предложи Месна заєднїца.
У сообщеню наведзене же ше понеже ше приблїжую лєтни горучави а зоз нїма и бурї и моцни нєпогоди, модлї гражданох же би цо скорей повиберали сухи и очкодовани древа хтори можу буц опасни за гражданох, а можу направиц и вельку материялну чкоду. Гражданє пред чию хижу єст таки трева, а пре одредзену причину як цо то хорота або старосц, нє можу сами окончиц орезованє треба же би ше приявели до Месней заєднїци –.