22. ЮНИЙ – На нєшкайши дзень народзел ше Мирослав Стрибер.
1675 – Основана Кральовска обсерватория у Ґриничу, на вимогу британского краля Чарлса II. Од 1884. року ше дефинує нулти меридиян (нулти ступень ґеоґрафскей длужини), хтори дзелї восточну и заходну полулабду Жемовей кулї. Зоз тей локациї ше мера стандардни час (Ґринични час, GMT).
1826 – Народзел ше писатель Тимотей Атанацкович (Бая, нєшка Мадярска, 22. юний 1826 – Бая, 9. септембер 1858), познєйше Боґобой Атанацкович, єден зоз обновительох сербскей прози после законченя рабства под Турками.
1898 – Народзел ше писатель Ерих Паул Крамнер, познати як Ерих Мария Ремарк (Оснабрик, Нємецка, 22. юний 1898 – Локарно, Швайцарска, 25. септембер 1970).
1906 – Народзел ше филмски сценарист, продуцент и режисер Били Вайдлер (Суха, Ґалиция, Австроугорска, 22. юний 1906 – Лос Андєлес, ЗАД, 27. марец 2002).
1930 – Оформене Добродзечне огньогасне дружтво Коцур.
1939 – Народзел ше поета Мирослав Стрибер (Дюрдьов, 22. юний 1939 – Темишвар, Румуния, 21. април 1971). После основношколского образованя закончел ґимназию у Новим Садзе и Правни факултет у Беоґрадзе, маґистровал на теми зоз социолоґиї. Од 1963. року Мирослав Стрибер бул асистент на Общей социолоґиї на Правним факултету у Новим Садзе. Литературни твори обявйовал у часопису Шветлосц, Литературним слове и Народним календаре, а заступени є у вецей антолоґийних виданьох. НВУ Руске слово обявело зборнїки писньох Романса (1969) и 55 писнї (1971). Погинул у транспортним нєщесцу нєдалєко од Темишвару у Румуниї.
Медзинародни дзень французких колачикох наволаних чоколадови еклер.