НОВИ САД – На схадзки Скупштини АП Войводини, медзи иншим принєшена и одлука о виробку Просторного плану подруча окремней наменки инфраструктурного коридора державней драги першого шора, на часци Кула–Боґоєво.
Потим як драга Кула–Боґоєво учишлєна до Просторного плану АП Войводини за период од 2021. по 2035. рок, општини Кула и Оджак прешлого року придали заєднїцку инициятиву Покраїнскей влади за порушованє виробку проєктней документациї за тот инфраструктурни проєкт.
Поверхносц подруча хторе облапене зоз оквирну гранїцу Просторного плану виноши кус вецей як 570 квадратни километри и облапя териториї општинох Вербас, Кула, Оджак и Апатин.
Покраїнски секретар за урбанизем и защиту животного штредку Неманя Ерцеґ надпомнул же ше виробок просторного плану инфраструктурного коридора державней драги першого шора, часц драги Кула – Боґоєво дотика швидкей драги „Ошмих Войводини”. Вон додал же понеже почала вибудов швидкей драги, Покраїнски секретарият за транспорт, будовательство и енерґетику дал инициятиву за виробок идейного ришеня же би ше пристанїще Боґоєво злучело зоз локалнима самоуправами хтори ґравитираю ґу будуцей швидкей драги од Бачкого Брегу по Српску Црню. На таки способ, як гварел, вибудує ше директна вяза хтора будзе значна за Кулу, Вербас, Србобран, Апатин и Оджак и оможлїви же би транспортни ґузел, хтори будзе коло пристанїща и ґайзибанскей инфраструктури, достанє драгу хтора помогнє у розвою привреди.