НОВИ САД – У Покраїнскей влади вчера, 21. юлия уручени 115 контракти у вредносци од 200 милиони динари хасновательом средствох по Конкурсу за потримовку младим польопривреднїком руралних подручох, сообщене зоз Покраїнскей влади.
Потримовка наменєна за розвой и унапредзованє примарней рошлїнскей и статкарскей продукциї же би млади польопривреднїки могли унапредзиц свойо ґаздовства, звекшац продукцию и обезпечиц сиґурнєйшу еґзистенцию.
Подсекретарка ресорного секретарияту Ивана Пейович Шеврт гварела на уручованю контрактох же Покраїнски секретарият за польопривреду, водопривреду и лєсарство препознава же яке важне дац потримовку младим людзом за перши крочаї розвою польопривредней продукциї. И же им циль нє лєм помогнуц поєдинєчни инвестициї, алє и направиц условия же би млади остали на валалє, розвивали власни ґаздовства и будовали сиґурну будучносц. Вона ище наглашела же таке вельке интересованє за тот конкурс потвердзує же таки мири потребни и же одвитую реалним потребом младим польопривреднїком.
На додзельованю контрактох поручене же ше зоз тим конкурсом до тераз потримало велїх младих польопривреднїкох, и же Покраїнски секретарият предлужи з мирами хтори доприноша модернизациї польопривредней продукциї, векшей конкурентносци ґаздовствох и отримуюцому розвою руралних подручох, стої у сообщеню.
