Перши Русински нєзависни моторкашски клуб у Словацкей „Карпати” ше рушел на моторкох нащивиц Руснацох у Войводини и Горватскей. Керестур им бул перши на драги, а до Вуковару пошли же би вєдно з домашнїм клубом „Вуковар” означели 20-рочнїцу його иснованя.
Иван Ґайдош (Семир), Мартин Команїцкий (Диґо), Роберт Иляш (Сршень) и Ґабриєл Шалата ше представяю як штирме „шедлаче на своїх коньох”. Вони члени Мото-клубу „Карпати”, а за себе гваря же су „Рутениян Райдерс”, лєбо русински вожаче.
Иван и Роберт, котри и єдни з найстарших членох, найвецей з нами приповедали, преплєтаюци свойо приповедки и надополнююци ше.
– Нє знам чи єст русински моторкашски клуб у Европи же би мал у своїм мену праве прикметнїк русински. Початок и формованє клубу бул покус компликовани, бо зме сцели назву клуба мац виписану зоз кирилку. У Словацкей ше нам нє допущели так реґистровац, та зме мено реґистровали зоз латинку. Цо ше дотика заєднїци байкерох, у нас таки правила же єден клуб муши прейсц одредзени фази же би бул припознати. Шицки моторкашски клуби у нас аполитични – политику до наших драгох и друженьох нє уключуєме – почина приповедку Роберт, а такой го надополнює Иван:
– Мото-клуб основани 2023. року, кед почала и перша фаза роботи клуба. У нєй ше упознаваме зоз другима моторкашскима клубами, ходзиме на заєднїцки стретнуца, толкуєме им хто зме, цо зме и цо сцеме. Друга фаза кед члени клуба доставаю мали амблем после рока активносцох. Його пришиваме на рукави шматох, на якнох котри характеристични за наш клуб и з тим амблемом ходзиме на стретнуца. После ище єдного рока активного стретаня зоз другима клубами почина и треца фаза роботи клубу, кед доставаме вельки амблем котри пришиваме на хрибет якнох и на таки способ презентуєме наш клуб. Вельки клуб, як тот котрому ми припадаме, „Дзиви конїˮ зоз Прешова, ма 13-15 таки мали клуби як наш.
Живот моторкашох
Гваря нашо моторкаше же зяри почина сезона, теди шедаю на моторки и починаю ходзиц на стретнуца зоз другима клубами. Отверанє сезони окреме интереснтне, кед и по 300, 400 моторки вєдно бродза по цалей Словацкей.
– През рок маме вельо таки стретнуца, алє перше у року окремне и прето же теди шицки приходза и вєдно ше дружиме, вариме, уживаме у рок музики, бо рок музика, якош, повязана зоз таким способом живота. У септембру, лєбо октобру ше завера сезону и знова ше шицки стретаме. Нам ше, у сущносци, сезона анї нє закончує, бо ше ми и вжиме стретаме на спортских активносцох як цо то столни тенис, або билияр. През цали рок маме наисце вельо акциї, бо то друженя шицких котри любя таки способ живота – пробую потолковац свой способ живота.
У клубу их тераз єст єденац, од котрих дзепоєдни уж маю полноправни статус членох, алє єст и таких котри тераз, так повесц, на другей ґарадичи членства и, франтую хлапци, док ище голєм три раз приду до Керестура, можу приступиц и до трецей фази, т.є. постац полноправни члени.
– Кажди рок ходзиме на медзинародну драгу. Прешлого року зме були у Румуниї, а того року зме ше порадзели же, кед зме русински клуб, нащивиме Руснацох. Контактовал сом по Фейсбуку и дознал же у Керестуре єст Мото-клуб „Шарканьˮ, бо Керестур русински валал. До Керестура зме пришли през Мадярску, алє зме ше нє барз могли знайсц, нє знали зме дзе просториї вашого клуба, нє знали зме анї дзе прешпиме. Повожели зме ше по Керестуре. Стретли зме якиш жени, та зме ше им питали чи ту жию Русини, а вони нам потвердзели и такой прекоментаровали: „Ниа, то нашо хлапци пришли!” И нам то було барз миле – гваря нашо собешеднїки.
У Керестуре ше хлапци з Медзилаборцох стретли з велїма людзми и мило им же их ту людзе прияли як своїх. Нашо моторкаше, хлапци зоз „Шарканюˮ их крашнє прияли.
– Зоз Словцкей зме принєсли дарунки клубом зоз котрима зме ше плановали стретнуц, та зме их у Керестуре зохабели при Славкови Надьовому Джамбови. Медзи иншим, то и два ношачи звука ґрупох ФС „Зарубаˮ з Нягова и „Лабирски бетяреˮ зоз Медзилаборцох. Хто жада од Керестурцох послухац тоту музику, може себе ю презняц. Думали зме же идземе ґу своїм людзом и же ше нє страциме кед зме при своїх. Упознали зме ше з велїма людзми, шицки сцели побешедовац. После Руского Керестура зме пошли нащивиц и Вуковар у Републики Горватскей, т.є. Мото-клуб „Вуковар” и участвовац на означованю 20-рочнїци иснованя того клубу. Там зме контактовали зоз Звонком Мудрийом, членом вуковарского мото-клубу – гваря моторкаше.
Нашо госци ше у Керестуре стретли з велїма людзми, були у Водици, а нащивели и Беоґрад и Нови Сад и, поносовали ше же нєт досц часу за шицко цо би жадали видзиц.
Жадаю охабиц шлїд поколєньом
– У нашим клубу жадаме шириц русинство, нашу културу, твориц медзисобни контакти шицким нам на хасен, котри нам нє допуща забуц же зме Русини. На наших мото-стретнуцох, хлопи бешедую о моторкох, жени о своїм, дзеци барз любя моторки, та ше вше дацо розпитую и сцу шедзиц на моторкох. Сцеме най людзе видза же моторкаше статочни, фамелийни людзе. Млади ше ганьбя повесц же су Русини, а ми им сцеме указац же ше нє треба ганьбиц за тото цо зме, алє же то треба почитовац и чувац. Жадаме будуци поколєня научиц же би ше нє бали, алє же би комуниковали медзи собу, же би були людзе, отверали єдни другим свойо шерцо. Ми, Русини, нє неґативни людзе, нє мержиме нїкого и то треба указовац и давац швету як приклад – закончую розгварку зоз своїма важнима порученями русински райдере зоз Словацкей.
