ОАКВИЛ (КАНАДА) – Презентация о Руснацох у Войводини под насловом Руснаци у Войводини – їх история и їх културни и духовни препород отримана внєдзелю, 11. октобра на 19 годзин по локалним чаше. Преподаванє отримане онлайн, прейґ платформи Зум (Zoom), и тирвало 50 минути, а потим була розгварка о теми, односно одвити на питаня патрачох презентациї.
У першей половки 2026. року зоз Карпаторусинского дружтва, чийо шедзиско у варошу Питсбурґу, у Пенсилваниї, ЗАД, послата инициятива Гавриїлови Колєсарови, хтори жиє у Торонту, у Канади, же би порихтал єдну презентацию односно викладанє о Руснацох у Войводини. Вон тоту иницятиву прилапел и порихтал текст и коло 200 фотоґрафиї, рисунки и документи и шицко тото, з помоцу його дзивки Ґабриєли, було упаковане до Пауер Поинт презентациї. Порадзене же би Ґабриєла була презентер и же би читала порихтани текст на анґлийским язику.
Уж на початку пририхтованя того викладаня замерковане же Карпаторусини у Америки мало знаю о Руснацох у Войводини. У складзе з тим формовани и змист преподаваня. Слухачом ше пробовало пояшнїц же Руснаци, хтори до Войводини пришли 1751. року, були мала и худобна национална ґрупа хторей ше удало, после 170 рокох живота и економского и културного моцнєня на югу Австроугорскей, такой после Першей шветовей войни розпочац процес културного препороду та ше вони у остатнїх 100 рокох воздзвигли до уровня малей нациї. У тим викладаню облапени цек процесу селєня зоз Карпатох до Войводини, история, вирски живот, школство, економия и руски фолклор (народни скарб) поведзене вецей о валалох Руски Керестур и Коцур, як и о особох хтори спомнутому препороду значно допринєсли.
Слухачом указане на факт же анї єдна русинска заєднїца у Европи нє дожила таки културни розвой яки дожили Руснаци у Бачкей и восточней Горватскей. Же образованє на руским язику облапене од дзецинскей заградки по универзитетски уровень, же ґимназия у Руским Керестуре єдина ґимназия на руским язику на швеце, же Катедра за руски язик и литературу на Универзитету у Новим Садзе була перша така институция на швеце.
Слухаче того викладаня могли дознац же войводянски Руснаци маю видавательну хижу хтора видава тижньово новини, часописи и кнїжки, же маю радийску и ТВ програму програму по руски, числени културни институциї и вецей фестивали.
Тото преподаванє знїмане у електронскей форми и будзе нєодлуга поставене у фонду преподаваньох на каналу Капаторусинского Дружтва на Ютюб платформи.