НОВИ САД – Всоботу, 5. децембра, у Руским културним центре у Новим Садзе отримана порядна схадзка Скупштини Дружтва за руски язик, литературу и културу (Дружтво), хтора мала шветочно-промоцийну и роботну часц, понеже є отримана и у рамикох 25. Дньох Миколи М. Кочиша.
Насампредз отворена вистава подобових роботох з Дзешатей колониї „Стретнуце у Боднарова”, хтору Дружтво отримує у Ґосподїнцох, а штредньошколки котри уча руски язик у Новим Садзе Оливера Пап и Лидия Вереш на отвераню по руски и по сербски пречитали биоґрафию Миколи М. Кочиша и його писнї. Виставу отворел предсидатель Скупштини Дружтва др Юлиян Рамач, Ирина Папуґа представела Моноґрафию „Подобова колония Стретнуце у Боднарова (2005–2014)”, а Владимир Салонски додзелєл припознаня и прикладнїк Моноґрафиї шицким учашнїком на Дзешатей колониї.
Ювилейне, 20. число и змист зборнїку Дружтва „Студиа Рутеника” представел др Юлиян Рамач, Леона Лабош Гайдук бешедовала о своєй кнїжки „Цеплосц дїлох, перли словох – штверо дїяче у култури зоз Шиду з презвиском Лабош”, док др Рамач представел и кнїжку Мирона Жироша „Америцки мен – правдиви приповедки о живоце Руснацох у Америки”. Представена и кнїжка Юлияна Папа „Стретнуца з прешлосци”, а рецензию Любомира Медєша за кнїжку пречитала мр Гелена Медєши.
На схадзки Скупштини прилапени звит о активносцох Дружтва у тим року, финансийни звит за 2014., як и финансийни звит по октобер 2015. року. Представени програма активносцох Дружтва за 2016. рок, як и програма 25. Дньох Миколи М. Кочиша, хтори тирваю по 18. децембер.
У рамикох Дньох Миколи М. Кочиша нєшка, 7. децембра, у Доме школярох „Бранково коло” у Новим Садзе на 20 г. будзе годзина руского язика пошвецена линґвистичней и литературней роботи Миколи М. Кочиша, а на ютре, 8. децембра, у Заводзе за културу войводянских Руснацох у Новим Садзе на 12 г. будзе промоция горе спомнутей кнїжки Леони Гайдук Лабош.
