ВЕРБАС – У просторийох КПД „Карпати” у Вербаше всоботу, 21. фебруара отримана порядна рочна Скупштина Рускей матки (РМ). Скупштину водзели предсидатель РМ Дюра Папуґа и заменїк предсидателя Миломир Шайтош, а присуствовали предсидателє месних одборох, Городского и Реґионалного одбору и други члени Матки.
Звит о роботи РМ у 2014. року поднєсол Дюра Папуґа, звити о роботи месних, Городского и Реґионалного одбору Матки їх предсидателє, а як и финансийни, прилапени су єдногласно. На Скупштини принєшени и План роботи РМ за тот рок як цалей орґанизациї, так и спомнутих одборох по местох.
Розпатрана и информация о поднєшених приявох РМ на конкурси Покраїнского секретерияту за културу и явне информованє АП Войводини и прияви на конкурс Министерства култури и информованя Републики Сербиї, у обласци явного информованя за 2015. рок.
На Скупштини бешедованє и о означованю 25-рочнїци Рускей матки и Дюра Папуґа пречитал Програму шветочного означованя ювилею, цо плановане 27. и 28. децембра того року.
Члени РМ на Скупштини поинформовани и о схадзкох Шветовей ради Русинох/Руснацох/Лемкох (РРЛ) и пририхтованьох за Тринасти Шветови конґрес РРЛ и Седми Шветови форум русинскей младежи, хтори у юнию того року буду у Румуниї, у Деви.
