НОВЕ ОРАХОВО – Централнa преславa Националного швета Руснацох у Републики Сербиї того року отримана всоботу, 17. януара у Новим Орахове.
Централна преслава почала з Архиєрейску Службу Божу хтору у Церкви Христа Спасителя предводзел владика Георгий Джуджар.
Потим у Доме култури Нове Орахово були поставени етно-столи Активу женох КУД Жатва з Коцура, а вец отримана промоция кнїжки Вично тирва 13. май о прешлосци рускей заєднїци у Новим Орахове, чийо коавторе Любо Рац и Олена Папуґа. О кнїжки бешедовали, окрем авторох, с пред МЗ Нове Орахово Гайналка Шипош, историчар Нимрод Томик и директор Заводу за културу войводянских Руснацох Сашо Сабадош.
На 20 годзин почала центална подїя преслави у Новим Орахове, Шветочна академия. У привитних словох Националне швето Руснацох у Републики Сербиї повинчовали предсидатель Националного совиту Стеван Самочета, кир Георгий Джуджар, предсидатель Општини Бачка Тополя Адриан Сатмари, помоцнїк министра за людски и меншински права и дружтвени диялог Стефан Срблянович, и подпредсидатель Покраїнскей влади Томислав Жиґманов.
На Академиї наступели музични секциї КУД Петро Кузмяк з Нового Орахова – тамбуркови оркестер и шпивацка ґрупа, з хторима руководзи Золтан Дудаш, як и наш квалитетни вокални солиста Борис Маґоч, Хор Церкви Успения Пресвятей Богородици з Коцура под дириґентску палїчку Александра Планкоша, як и Национални оркестер под руководством Мирослава Папа. Ґу тому, як рецитатор ше представел Александар Планкош з стихами зоз поеми Мироня Жироша Надїя под цудзим нєбом хтори гуторя о насельованю Руснацох до Орахова.
После Академиї, у бачкей Тополї орґанизоване веселе друженє з вечеру, музику и танцом за учашнїкох и нащивительох преслави.
Орґанизатор Централней преслави Националного швета Руснацох Завод за културу войводянских Руснацох у сотруднїцтве з Националним свитом Руснацох, КУД Петро Кузмяк з Нового Орахова, МЗ Нове Орахово и Општину Бачка Тополя.
