РУСКИ КЕРЕСТУР – Фодбалски клуб „Русин”, стреду, 21. януара почал зоз пририхтованями за ярню часц першенства ПФЛ Зомбор у сезони 2025/26.
Керестурски фодбалере перши тренинґ мали у Спортскей гали у Руским Керестуре, а одволало ше красне число од скоро 20 бавячох. На першим тренинґу були и даскельо бавяче зоз подростку, док дзепоєдни пре обовязки були оправдано одсутни.
У добрей атмосфери, тренер Русина Далибор Милец и управа ФК „Русин” пожадали бавячом добри пририхтованя, най би шицко прешло без покалїченьох, же би ше у першенстве предлужело зоз добрима партиями и закончело у самим верху таблїчки.
Кед слово о помоцнєньох, влонї до клубу пришли два мена. Єдно уж познате Керестурскей публики, Оґнєн Маркович, бавяч штредку терена, хтори пришол зоз кулского Гайдуку, док друге мено, то млади Марко Кривачевич, центерфор, хтори пришол зоз ФК „Кула”.
Заплановане же би ше одбавело 7 пририхтуюци стретнуца, а тренер Милец ше будзе през тренинґи и стретнуца намагац цо лєпше порихтац екипу за першенство.
Перше пририхтуюце стретнуце будзе ше бавиц на соботу, 31. януара у Руским Керестуре зоз екипу ОФК „Славия” зоз Нового Саду.
