РУСКИ КЕРЕСТУР – Екатерина Козицкий зоз Русиї, за хтору у Руским Керестуре уж даскельо мешаци порушана гуманитарна акция, нєдавно по другираз закончела у шпиталю у Вербаше, дзе єй одстранєна часц панкреасу и циста. Пенєж за тоту пейцочлену фамелию ше збера по дутянох, а акция будзе тирвац ище даскельо днї же би ше им цо скорей уручело назберани пенєж, пре новонастати трошки лїченя.
Екатерину до шпиталю прияли 3. децембра, бо мала високу горучку пейц днї, там є оперована. Вона ше тераз чувствує лєпше, гоч операция була компликована, алє пред фамелию Козицкий нови трошки и нєизвесносц.
Ґу тому, понеже Екатерина лєм цо почала робиц у валалскей дзецинскей бавяльнї, о кратки час закончела у шпиталю, як гварел єй супруг Александар, та су тераз обидвойо застарани же цо будзе зоз єй роботу и як ше їх финансийна ситуация далєй будзе одвивац. През лєто вони обидвойо ходзели по наднїцох, Екатерина до валалу пекла колачи, а и вон активно глєда стаємну роботу.
Прето фамелиї Козицкий модлї за помоц чи у форми пенєжу, продуктох або роботним месце за Александра.
Шкатули за пенєжни прилоги ище вше поставени на велїх локацийох по предавальньох у валалє, и там буду ище даскельо днї, по Крачун, кед ше тоту акцию планує закончиц.
Кажде хто жада помогнуц тей фамелиї, пенєж може уплациц на їх динарски рахунок на число: 200-7100000044324-39, банка Поштанска штедионица, продукти им мож однєсц и на їх адресу Народного фронта 32, або им писац на вибер число 062/8120766.
Фамелиї з Русиї потераз помогли числени людзе з валалу и волонтере Каритасу хтори им углавним ношели поживово продукти або пенєжи. Од велькей помоци були и члени Добродзечного огньогасного дружтва, даскелї приватни поднїмателє, а ту и Здруженє гражданох „Пакт Рутенорумˮ хтори зберали средства на каждим збуваню хторе орґанизовали.