БЕОҐРАД – Од Министерства за старанє о валалу два млади малженски пари зоз општини Вербас достали средства за купованє хижи зоз заграду. Пенєжи за купованє хижи у Коцуре достали малженска пара Марияна Кечкеш и Борко Арх, а за хижу у Бачким Добрим Полю Даниєла и Радован Милутинович.
Спред локалней самоуправи контракти на святочносци у Палати Сербиї 30. октобра зоз министром за старанє о валалу Миланом Кркобабичом подписала заменїца предсидателя општини Вербас Тияна Алексич.
У вияви за „Руске слово” Борко Арх гварел же його супруги Марияни и йому вельо значи помоц хтору достали од держави. Маю тройо мали дзеци, нє заняти су стаємно, робя сезонски роботи и по тераз жедлярели, так же з помоцу держави тирвацо ришели биванє.
Oд початку акциї купованя хижох за млади пари, хтору порушало и реализує Министерствo за старанє о валалу, по тераз додзелєни средства за купованє 2.650 хижи, у хторих жию вецей як дзешец тисячи млади людзе, фамелиї з дзецми, сообщене з того Министерства.