Жителє Коцура вше почитовали кнїжку и любели читац, цо потвердзує податок же перша читальня у тим нашим валалє основана пред 146 роками
Читальня у Коцуре основана пре закладанє валалчаньох 1879. року и єдна є з найстарших институцийох тей файти у Войводини. Теди кед є основана, мала седемдзешат кнїжки по руски и двацец пейц кнїжки на нємецким язику, мала и пейдзешат членох, а теди члени могли буц лєм хлопи. Коцурска читальня барз добре сотрудзовала зоз дружтвом „Просвита” зоз Львова у України, та єден час була аж и його член (1884–1893), пише у моноґрафиї „135 роки коцурскей читальнї”, хтора обявена 2014. року. Моноґрафию пририхтали длугорочна библиотекарка Ирина Тамаш и професор историї Владимир М. Калєвич, а видала ю Народна библиотека „Данило Киш” з Вербасу.
Попри постояцей Читальнї, 1902. року основана ище єдна – Землєдїлска читальня, хтора превжала улогу орґанизованя културного живота у валалє, а и у тей читальнї члени були Руснаци, Нємци и Мадяре.
Док тирвала Друга шветова война Читальня нє робела, по войни, после отвераня, Читальню ше селєло даскельо раз, а од 1963. року, по одлуки Општинскей ради, на предклад Совиту за културу Општини Вербас, Читальня у Коцуре припоєна ґу Народней библиотеки у Вербаше, у чиїм составе є и нєшка. За окремне доприношенє и роботу у обласци култури, 1978. року Библиотека у Коцуре достала Октоберску награду Скупштини општини Вербас.
Оддзелєнє Народней библиотеки „Данило Киш” у Коцуре вше барз добре сотрудзовало з Основну школу „Братство єдинство” з Коцура, як и з релевантнима установами хтори пестую културни и национални идентитет Руснацох у Войводини, пишу хронїчаре.

Промоциї литературних дїлох, вистави и манифестациї
Од септембра прешлого року у библиотеки роби мастер социолоґ Татяна Колєсар, а библиотекарка Весна Радошевич Пешут пошла до пензиї. За тераз Весна ище помага Татяни, уводзи ю до роботи, преноши єй свойо знанє, вецейрочне искуство у библиотекарстве и вона єй ментор док ше пририхтує за покладанє державного испита, а вєдно поробели и попис кнїжкох.
– Оддзелєнє у Коцуре ЯБ „Данило Киш” з Вербасу, по остатнїм попису хтори закончени тих дньох, розполага зоз 12.231 кнїжку. Од того числа 10.615 кнїжки на сербским язику, 46 кнїжки на мадярским и 1.569 кнїжки на руским язику. Од кнїжкох на руским язику, 881 кнїжка за одроснутих, у рамику того єст фахова литература и 746 кнїжки з обласци уметнїцкей литератури – гутори библиотекарка Татяна Колєсар.
Вона додава и же дзецински кнїжки на руским язику єст 688 и же то литература за дзеци, а попри тим єст и 60 сликовнїци.
– У 2024. року обезпечени 6 нови кнїжки на руским язику, по три за дзеци и за одроснутих. Од преси до библиотеки на руским язику доставаме тижньово новини „Руске слово” и часописи „Заградка” и „Шветлосц” – гутори Колєсарова.
У рамикох дзецинского тижня у библиотеки ше традицийно отримує промоциї литературних дїлох и темох з общей култури.
– У прешлим року отримани штири промоциї дїлох руских писательох за дзеци зоз руских оддзелєньох основней школи, на хторих присуствовали 37 школяре. Дзецом зоз Оддзелєня у Коцуре Предшколскей установи „Бошко Буха” з Вербасу отримани два презентациї, на хторих присуствовали 40 дзеци. Библиотека участвує у отримованю рижних манифестацийох у валалє як цо, наприклад, Медзинародни фестивал гумору и сатира „Коцурска чутка”, у чиїх рамикох нєдавно у библиотеки була вистава стрипох „Алан Форд”. Роками ше у библиотеки означує и швета Святи Трифун и Святи Валентин – гутори Колєсарова и додава же кед єст нагоди, та ше отримує и стретнуца з писателями хтори пишу по руски, як и писателями хтори пишу по сербски.
Актив женох КУД „Жатва” з Коцура ше од 1988. року у библиотеки сходзи каждей стреди на 17 годзин и шицки членїци Актива маю членски карти библиотеки и дзечнє читаю кнїжки.
Акциї на популаризованю кнїжкох
– Коцурска библиотека означує 21. фебруар – Медзинародни дзень мацеринского язика, 22. фебруар – Дзень установи кед ше додзелює на дарунок кнїжку найактивнєйшим читачом, 2. април – Медзинародни дзень дзецинскей кнїжки и 23. април – Медзинародни дзень кнїжки. Означує ше и Октобер – мешац кнїжки и з тей нагоди ше у библиотеки орґанизує приєм за школярох першей класи и вони ше теди можу задармо уписац до библиотеки, упознац ше з тим як треба читац и чувац кнїжки и достац членску карту. У мешацу кнїжки, у першим тижню октобра, як и 2. априла, шицки школяре основней и штреднєй школи ше можу задармо уписац до библиотеки. Шицки жителє Коцура ше можу у другим тижню у октобру, як и 23. априла уписац до библиотеки и вихасновац знїженє 50 одсто на цену членарини – гутори Татяна Колєсар.
Длугорочна библиотекарка Весна Радошевич Пешут ма надосц стажу и искуства у тей роботи и гвари же кнїжки читаю шицки ґенерациї, а найвецей школяре основней школи, окреме тоти од першей по штварту класу.
– Школяре читаю лектири, а други читаче белетристику. Людзе любя читац животни приповедки, трилери и драмски трилери, епску фантастику, традицийни приповедки, шветово або локал-патриотски. Єст читачох хторих интересую рижни обласци и теми, а єст и тих хтори ше тримаю лєм єдней обласци. Кед ше у розгварки з читачом препозна сензибилитет и же є заинтересовани, библиотекар му може препоручиц кнїжки хтори сполня його обчекованя и хтори будзе дзечнє читац. Тиж так, у библиотеки важне пестовац атмосферу же би читаче дзечнє приходзели по кнїжки – гутори Весна Радошевич Пешут.
Як дознаваме од новей библиотекарки Татяни Колєсар, виплановане же би нєодлуга Оддзелєнє библиотеки у Коцуре достало свой Фейсбук бок, на хторим буду представени нови кнїжки у библиотеки и вообще нови кнїжки, же би ше их популаризовало. У рамикох сотруднїцтва з ОШ „Братство єдинство” у библиотеки ше отримує даєдни роботнї вязани за предмет гражданске воспитанє, а планую орґанизовац и роботнї хтори вязани за актуални теми и спокуси дзецох и младих як цо, наприклад, упознаванє зоз ефикаснима технїками ученя, мирне превозиходзенє конфликтох и подобне, хтори би им мали олєгчац одрастанє. Иншак, у библиотеки єст надосц такей литератури, хтору би могли пречитац и родичи.
Найстарша кнїжка молитвенїк з 1670. Року
Медзи найважнєйшима кнїжками хтори коцурска библиотека чува, хтори представяю значне културне богатство, то Молитвенїк друковани у Львове 1670. року, „Собраниє рижних почительних слов” друковане у Москви 1760. року, Псалтир з 1776. року (хтори тераз чека на реставрацию) и Катахизис з 1854. року.
Библиотека розполага и з даскельома насловами хтори друковани у 19. вику и важне су жридло за виучованє библиофилства. У библиотеки ше чува Повеля Дружтва „Просвита” з 1884. року и таблони зоз сликами членох коцурскей читальнї з 1904. року, 1912, 1924. и 1937. року, цо вшелїяк, же гутори о вельким почитованю друкованого слова.
