КОЦУР – Националне швето Руснацох котре ше означує 17. януара на пригодни способ преславели и школяре Основней школи „Братство єдинство” у Коцуре. Тот святочни дзень им бул виполнєти з активносцами вязанима за руски народ.
Учительки и учитель у руских оддзелєньох нїзших класох з тей нагоди зоз школярами бешедовали о историї Руснацох и о тим цо значне за нашу руску заєднїцу. Наставу почали зоз слуханьом рускей шветочней шпиванки „Браца Русини”, а того дня читали писнї руских поетох, шпивали руски дзецински и народни шпиванки, а бешедовали и о руских обичайох.
За Дзень Руснацох школяре з даєдних оддзелєньох зоз своїма учительками направели и панои з фотоґрафиями и рисунками на котрих була приказана наша прешлосц, народне облєчиво, култура, обичаї и з тима паноами прикрашели школски конк. Школяре з других оддзелєньох з нагоди Националного швета правели и вифарбйовали руски герб и заставу.
Националне швето Руснацох означели и руски дзеци у Предшколскей установи „Бошко Буха” – Оддзелєню „Герлїчка” у Коцуре. За тот дзень воспитачки Єлена Буила и Татяна Скубан Тодорович обдумали интересантну и пригодну програму за наймладших, а тиж и бешедовали з нїма о нашей историї и шицких значносцох вязаних за руску заєднїцу. З тей нагоди шпивали и руски шпиванки, и були у святочним розположеню цалого того дня.
