З наздаваньом же предлужиме робиц на хасен нашей Рускей заєднїци, шицким Рускиньом и Руснацом, як и шицким хтори нам помагаю, потримую нас и жию зоз нами, винчуєм наиходзаце Националне швето Руснацох.
Од 4. септембра 2025. року, кед сом вибрани за предсидателя, а окреме од нового формованя одборох НСРНМ, 13. новембра 2025. року, можем повесц же зме мали конструктивни схадзки, хтори оможлївели же уж на початку 2026. року пред нами фундаменти Новей националней стратеґиї. Розгварки зоз министром за людски и меншински права Демом Беришом и министром информованя и телекомуникацийох Борисом Братином, як и схадзка Координациї националних совитох, участвованє на округлим столє о применьованю меншинских язикох у Новим Садзе, участвованє на дводньовей конференциї о дискриминациї националних меншинох у Беоґрадзе и схадзка Одбору за службене хаснованє язика и писма, хтору зволал предсидатель проф. др Михайло Фейса, допринєсли формованю визиї хтору представим у 10 точкох.
Перше, нєобходне основац Совит за медзинационални одношеня у 6 општинох: Бачкей Тополї, Вербасу, Жаблю, Кули, Новим Садзе, и Шидзе.
Друге, потребне обезпечиц роботу голєм єдней особи, фахового судского прекладателя за руски язик, у каждей зоз спомнутих 6 општинох. Тота особа би була задлужена и за представянє општини и єй месних заєднїцох на руским язику на сайтох општинох и їх месних заєднїцох.
Треце, насампредз у вязи зоз роботу фахових прекладательох, нєобходне осучаснїц правописну и терминолоґийну литературу, у тим контексту попробуєме запровадзиц и виучованє руского язика як виборного на шицких факултетох Новосадского универзитету.
Штварте, нєобходне осучаснїц курикулуми на шицких уровньох образованя; при тим, треба запровадзиц концепт интеркултурносци до нових учебнїкох. Правиц нови и сучасни учебнїки.
Пияте, нєобходне очувац образовну вертикалу на руским язику з акцентом на предшколским образованю, понеже праве зоз того уровня образованя мож реално обчековац же дзеци пойду и на уровень основного образованя, и на уровень стреднього образованя, и на високе и на найвисше образованє.
Шесте, треба запровадзиц новоздобути бенефити ИСО-коду за руски язик до шицких 10 сферох хаснованя руского язика, хтори свойочасово видзелєл проф. др Александер Дуличенко. У рамикох тей активносци НСРНМ ше будзе намагац вихасновац огромни простор на интернету и диґитализовац вкупни руски скарб; учебнїки обезпечиц и у е-форми же би прейґ Клауду були доступни на каждей точки Жемовей кулї и же би евентуални пременки курикулуму лєгко, фришко и туньо були запровадзени; потримац роботу на Рускей Википедиї, Рускей енциклопедиї, Ґуґл транслейту, штучней интелиґенциї по руски, алґоритмох на Руско-анґлийским словнїку, спелинґ чекеру итд.
Седме, треба стимуловац припаднїци и припаднїкох рускей националней заєднїци же би документи чиповали и вимагали їх видаванє и на руским язику, двоязично.
Осме, вимагац од редакцийох медийох на руским язику же би на тижньовим уровню випродуковали голєм єден писани, аудио и аудиовизуални резултат, хтори би ше директно одношел за даєдну зоз предходно начишлєних темох; з тим цильом НСРНМ ше будзе закладац и за роботу Радия Руски Керестур, чию би ше програму нє чуло лєм у Руским Керестуре;
Дзевяте, орґанизовац трибини и округли столи на теми дзе даяки проблем треба ришовац; перши хтори буду орґанизовац одбори и роботни цела НСРНМ буду ше одношиц на анализованє потерашнєй роботи НСРНМ.
Дзешате, почац активносци же би на попису 2031. року могли вияшнїц и Рускинї и Руснаци хтори жию у иножемстве и ещи вше маю и державянство Републики Сербиї;
Обчекуєм же у перших двох мешацох и други одбори и други роботни цела, чи обновени чи цалком нови, принєшу основни напрямки дїлованя у функциї унапредзеня свойого поля експертизи и же, после явней розправи, по стредок 2026. року руска национална меншина достанє щиру руску и нєдвосмислову Националну стратеґию зоз конкретним Акцийним планом.
Стеван Самочета,
предсидатель Националного совиту Руснацох