Можеме повесц же єден зоз найважнєйших сеґментох за чловекову еґзистенцию и здрави психофизични розвой котри нас водзи през живот то любов ґу животиньом. Наша собешеднїца Тамара Балоґ зоз Дюрдьова свою любов ґу псом спознала ище у вчасним дзецинстве, а нєшка преросла до отвераня гиґиєнского салону за пси.
Як пришла на идею отвориц салон, як випатраю третмани, кельо часу потребне за ушорйованє єдного пшичка и велї други интересантносци, дознаваме у рогварки зоз Тамару, котра гвари же любов ґу животиньом од вше исновала.
– Одкеди знам за себе, знам и же зме вше мали даяки животинї у фамелийним дворе. И кури, и качки, гандзлики, пульки, швинї, заяци, мачки, пси, мали зме аж и подаєдно коще и баранче. Но, якошик я найвецей водзела рахунка о псох и мачкох, алє вше сом мала найвекшу прихильносц ґу псом. Углавним то вше були мишани пшички – Рибица, Боби, Бета, Кика, Рики. Окремне чувство ґу псом ше зявело пред скоро дзевец роками, кед сом од свойого леґиня, тераз уж супруга, достала на дарунок щенє, пекинезера, хторе сом наволала Леа, а з часом, постала Лейка. Ту шицко почало. То бул перши мой, лєм мой пес, о хторим я мала водзиц рахунку. Купац ю, кармиц, лїчиц кед же ше похори и подобне. А тераз ше тота любов звекшала, маме цалу ґенерацию пекинезерох – бабу Зои, маму Лейку и унуку/дзивку Айшу. Попри нїх мам и мишанку Лолу и Киру хтору зме удомели.
Цо ше дотика того же як сом пришла на идею отвориц салон за пси, о ґруминґу сом роздумовала єден час, а понеже барз любим пси и любим их купац и шориц, одлучела сом ше на тот крочай. Уписала сом ше на курс за ґрумера, ходзела сом штири мешаци до єдного салону у Новим Садзе дзе сом шицко научела – купац, фенирац, допатрац уха, штригац нохци, по саме штриганє пса и зоз машинку, и зоз ножнїчками – толкує Тамара Балоґ.
КОЗМЕТИКА И ФРИЗЕРАЙ
Гиґиєнски третман за псох подрозумює – купанє, сушенє, фениранє пса, чисценє ухох, штриганє нохцох и бритвенє лабох и гиґиєнскей часци. Дахто може глєдац лєм змиванє пса, а кед ше го штрига, вец ше роби перше гиґиєнски третман, а потим ше го штрига. Пса мож штригац зоз машинку окремну за псох, на котрей ше меняю рижни длужини ножох и предлуженьох, цо значи же на яку власнїки длужину сцу же би ше им оштригало пса, таки ше кладзе нож, або предлуженє. Тиж так, пса ше штрига и зоз ножнїчками, и ту єст рижни файти ножнїчкох, ровни мали и вельки, закривени мали и вельки, чанкерс або чанкерици як ми воламе, ефилирки и кажди ножнїчки ше хаснує за розлични часци цела. Як цо єст розлични ножнїчки, так єст и розлични файти щеткох и гребеньох, як и окремни ножнїчки за нохци. Тиж так, єден ґрумерски салон муши мац кадзу за купанє, стол за штриганє и окремни ґрумерски фен.
Нє кажди пес исти, та зме ше Тамари опитали цо єй найвекше виволанє у роботи.
– У сущносци, кажди пес на даяки способ виволанє, алє затераз сом ище нє мала анї єдного пса котрого сом нє могла окупац, оштригац, лєбо дацо друге. Случи ше же пшичок нємирни на столу док ше суши, фенира, чи штрига, алє ґрумер го просто муши звладац. То мож вежбац на курсу, алє нє шицко до вежбаня. Дакеди досц лєм же би ґрумер у таких хвилькох, цо досц чежко, бул змирени, же би и пес то почувствовал и змирел ше. Наприклад, ґрумере углавним нє практикую же би власнїки источасно нє були у салону, понеже аж вец пес зна буц нємирни, бо ше чувствує сиґурно коло власнїка. Мала сом єдного пса котри, кед власнїки пошли, сцел укушиц, алє и у такей хвильки ше нє шме панїчиц и злєкнуц, та сом их вец мушела волац же би ше врацели, и вец сом го без проблему могла и купац, и сушиц, и штригац. Просто, кед жадаш буц ґрумер, мушиш барз любиц псох и нє шмеш ше бац од нїх!
КАЖДИ ЛЮБИМЕЦ ИНШАКИ
Пси котри маю кандрасту, длугоку шерсц, завиши и од файти пса, требало би голєм на два мешаци же би приходзели на штриганє, може и до три, алє кед ше и дома водзи рахунка о нїх, щетка их, же би ше псови насампредз нє замервела шерсц и же би крашнє и шорово випатрал.
Нє кажди ше пес штрига, т.є. краткошерсцови мож штригац, алє на власнїкову одвичательносц и то углавним робя тоти котрим пес жиє у квартелю и лєнї ше. Важне же би их власнїки купали з часу на час, щеткали, чесали, штригали нохци…
– Мала сом вшелїяки случаї, же им барз замервена шерсц, и то мож розчетковац, алє то мученє насампредз, за пса, а потим и за ґрумера, бо то тирва. То исте таке як кед би ше людзе мешацами нє чесали и штригали. Було случаї же псом нательо длугоки нохци же ше покруца и теди пес нє може анї нормално ходзиц. Шицкого єст. И то лєм гутори о тим же яки тоти власнїки – гутори Тамара.
Затераз сом ище вше нє мала даяки нєзвичайни ситуациї же бим наприклад фарбелап сови шерсц, а думам же бим то анї нє робела, бо нє видзим потребу за тим, пес нє бависко. Алє ми у шоре кед власнїк сце даяку нормалну фризуру, нїч накарадне, як наприклад репики, або кикци, и то нє кажди пес церпи таке на глави. И то ше нормално муши мерковац же би ше нє сцисло барз, же би их нє скубало – през ошмих.
ОДВИЧАТЕЛЬНОСЦ ВЛАСНЇКОХ
Нєшка зме шведкове и же ше велї власнїки нє стараю як треба о своїх псох.
– Думам же нєшка велї маю любимцох и у векшини случайох то пси, и менєй-вецей векшина ше добре стара о нїх, алє вшелїяк же вше єст и тоти екстремни случаї. По моїм думаню, кед сцеш мац пса, або даякого любимца, мушиш мац и часу за ньго. Кед нє маш часу, нє бер любимца. Поготов же нєшка єст барз вельо пси на улїцох, а за тото лєм людзе виновати. Велї знаю вжац щенє, а кед вирошнє, вецей им є нє интересантне и виженю го. Таких треба покарац – закончує розгварку Тамара Балоґова
КЕЛЬО ТИРВА И ЯК МОЖ ЗАКАЗАЦ ТЕРМИН
Цо ше дотика заказованя терминох, найлєпше ше явиц голєм два днї скорей же би ше могло добре орґанизовац.
– Термин мож заказац на Инстаґраму, або Фейсбуку котри сом наволала GroomRoomTamara, а там пише и число телефона, та и так мож заказац фини третман за свойого пса, а думам же то кажди пес заслужує. Треба коло два годзини же бим цалком ушорела пса, зоз фотоґрафованьом на початку и на концу. Понеже каждого пса котрого ушорим любим фотоґрафовац, же бим поровнала яки бул пред штриганьом, и яки на концу резултат, а же би то видзели и други – толкує Тамара Балоґ.