НОВИ САД – Студентох на першим року основних студийох Филозофского факултету у Новим Садзе хтори студираю мацерински язик, а добитнїки су стипендийох Покраїнскей влади за 2023/2024. рок привитал нєшка покраїнски секретар за високе образованє и наукововиглєдовацку дїялносц проф. др Зоран Милошевић, знагоди Медзинародного дня мацеринского язика.
На приєму у Покраїнскей влади була деканка Филозофского факултета проф. др Ивана Живанчевич Секеруш, а медзи студентами и два студентки зоз Оддзелєня за русинистику Катарина Фейди и Михаела Еделински.
У тим школским року стипендиї достали дзевец найлєпше ранґовани студенти першого року, а винос стипендиї 20.000 динари и достава ше ю дзешец мешаци.