Моцна руска култура у Сримскей Митровици

автор Вл. Дїтко, фото: В. Вуячич
124 Опатрене

СРИМСКА МИТРОВИЦА – У Велькей сали Театра „Добрица Милутинович“, вчера 18. януара, отримана шветочна aкадемия у рамикох централней преслави Националного швета Руснацох у Републики Сербиї.

Академия почала зоз гимну „Боже правде“ и шветочну шпиванку Руснацох „Браца Русини“, хтору одшпивала Мишана шпивацка ґрупа Руского културного центра з Нового Саду чиї руководитель Борут Павлич, а у провадзеню Националного оркестру под управу Мирослава Папа.

На початку здогаднуте и на историйну подїю у вязи зоз 17. януаром 1751. року о насельованю 200 грекокатолїцких фамелийох на тоти простори. Спрам историйних жридлох, Руснацох ше у Сримскей Митровици спомина штредком 19 вику, а приселєли ше з околїска Бардейова у Словацкей и Ґорлицох у Польскей.

У уметнїцкей часци програми наступела професорка ґитари у Музичней школи „Петар Кранчевич“ Ивана Ференц хтора виведла композицию „Мистериозни пребувалища“ автора Душана Боґдановича.

Мишана шпивацка ґрупа Дружтва Руснацох зоз Сримскей Митровици, чия руководителька Йованка Иванич, одшпивали вецей шпиванки. Подобова уметнїца Ясна Арбанас, представела ше зоз писню „Портерт Сримца“, а вокални солиста Йовґен Надь одшпивал „Били орґони“ и шпиванку „Лєм за тебе“. Пияниста Александер Цундра и флаутистка Исидора Козлина виведли „Концерт за флауту, число штири, треци став“ французкого композитора Франсоа Девєна, а потим ґлумец Владимир Бачащак гуторел бешеду „Аманет“ хтору написала Єлена Янкович.

Агнетка Тимко Мудри, Йовґен Надь и Мирослава Даждиу одшпивали народну шпиванку „Бимбора, бимбора“, а Национални оркестер ше представел зоз „Венчиком народних мелодийох“.

Шветочна академия закончена зоз композицию „З давен давна“, хтору одшпивала Мишана шпивацка ґрупа Руского културного центра Нови Сад у провадзеню Националного оркестру.

ПОВЯЗАНИ ТЕКСТИ